“Bavariya” Kompani bilan shartnomani 2029-yilgacha uzaytirdi

Vensan Kompani Myunxenning “Bavariya” klubi bilan shartnomasini 2029-yilgacha uzaytirdi. Avvalgi kelishuv 2027-yilda yakunlanishi kerak edi.

Euro-football.ru ma'lumotiga ko'ra, klub rahbariyati Kompanini “Manchester Siti” o'z safiga qo'shib olishidan xavotirda edi. Xosep Gvardiola 2026/27-yilgi mavsumdan so‘ng “Manchester Siti” bosh murabbiyligidan ketishi mumkin.

Shu sababli ingliz klubi Kompaniga qiziqish bildirgan. “Bavariya” rahbariyati 39 yoshli murabbiy bilan uzoq muddatli shartnoma tuzishga qaror qilgan.

Kompani 2024-yil yozida “Bavariya” bosh murabbiyi bo‘ldi. Jamoa o‘tgan mavsumda Germaniya Bundesligasida g‘olib chiqqan.

Yangi mavsumda esa barcha musobaqalarda ketma-ket 12 ta o‘yinda g‘alaba qozongan.

Sardor Ergashev

«ZAMIN.UZ» muharriri