«Inter Mayami» yetakchisi Lionel Messi AQSHning MLS chempionatida eng ko‘p gol urgan futbolchi sifatida «Oltin butsa» sovriniga sazovor bo‘ldi. Argentinalik yulduz bu mukofotni pley-offning 1/8 finalida «Neshvill»ga qarshi bellashuv oldidan qabul qildi.
Uchrashuv Florida shtatidagi Fort-Loderdeyl shahrida joylashgan «Cheyz Stedium»da bo‘lib o‘tmoqda. Hozirgi hisob — 2:0 «Inter Mayami» foydasiga, gollardan biriga Messi mualliflik qildi.
38 yoshli hujumchi mavsum davomida 28 o‘yinda maydonga tushib, 29 ta gol urdi. Uning eng yaqin raqiblari — «Los-Anjeles» futbolchisi Deni Buanga va «Neshvill» hujumchisi Sem Sarrij 24 tadan gol bilan orqada qoldi.
Messi 2023 yil yozidan buyon «Inter Mayami» safida o‘ynab kelmoqda. Shu vaqt mobaynida u jamoa sharafini 82 marta himoya qilib, 71 ta gol va 37 ta assist qayd etdi.
Transfermarkt portali ma’lumotiga ko‘ra, afsonaviy futbolchining bozor qiymati hozirda 18 million yevroni tashkil etadi.
“Zamin”ni Telegramʻda oʻqing!
