“Manchester Siti”ning iqtidorli va ko‘p pozitsiyada o‘ynay oladigan himoyachisi Yoshko Gvardiol yaqinda o‘tgan suhbatlardan birida yoshligida futbolni umuman tark etish haqida o‘ylaganini oshkor qildi.
Xorvatiyalik futbolchi 2023-yili “RB Leypsig”dan Angliyaga 77 million funt evaziga ko‘chib o‘tgandi. Bu transfer uni dunyo futbolidagi eng qimmat himoyachilardan biriga aylantirdi — faqatgina bir necha futbolchi undan yuqoriroq summaga jamoa almashtirgan.
Ammo bu yutuqlar ortida faqat iste’dod emas, balki katta sinov va ichki kurashlar ham bor. Yoshko Gvardiol VVS nashriga bergan intervyusida 16 yoshida “Dinamo Zagreb” safida o‘ynab yurgan paytda futboldan lazzat ololmaganini va sport yo‘nalishini o‘zgartirish haqida jiddiy o‘ylab ko‘rganini aytib o‘tdi.
“Bir vaqtlar futbolni tashlashni istaganman. Chunki maydonda o‘zimni baxtli his qilolmasdim. Atrofimdagi do‘stlarimning deyarli barchasi basketbol bilan shug‘ullanardi. Men ham shu yo‘lni tanlasammi, deb o‘ylagandim. Futbolda kelajagimni ko‘rmasdim”, — deydi Gvardiol.
Shu bilan birga, u bu qarorni qabul qilish orqali hayoti butunlay boshqacha yo‘nalish olishi mumkinligini ham yaxshi anglaganini ta’kidladi:
“Agar besh yil avval mendan ‘2025 yilda o‘zingni “Manchester Siti”da ko‘ra olasanmi?’ deb so‘rashganida, albatta, yo‘q, deb javob bergan bo‘lardim. Lekin hayot men kutmagan yo‘ldan olib ketdi”.
Gvardiol hozirda “Siti” tarkibida Pep Gvardiola uchun muhim figuraga aylangan. U himoyada ham, yarim himoyada ham o‘z o‘rnini topgan va jamoa muxlislari orasida tezda sevimli o‘yinchiga aylandi. Uning jismoniy tayyorgarligi, yuqori zehniyati va universal o‘yini sababli Gvardiola uni katta ishonch bilan asosiy tarkibda qo‘llamoqda.
Murabbiylar shtabi fikricha, Yoshkoda kelajakda “Siti” himoyasining yetakchisiga aylanish salohiyati bor. Uning yosh bo‘lishi, tezkor qaror qabul qilish qobiliyati va kurashchanligi bu prognozni yanada mustahkamlaydi.
Futbolni tashlash haqida o‘ylagan bir yigitning bugun dunyoga mashhur bo‘lgan klubda asosiy tarkibda o‘ynayotgani — bu haqiqiy ilhom manbai. Yoshko Gvardiol o‘zining mehnat va sabr-qanoati orqali har qanday qiyinchilikni yengib bo‘lish mumkinligini isbotladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
