“Inter Mayami” himoyachisi va “Barselona”ning sobiq futbolchisi Jordi Alba sobiq jamoasining hozirgi holati haqida fikr bildirdi. Uning ta’kidlashicha, Hans-Diter Flik rahbarligidagi “Barselona” to‘g‘ri yo‘nalishda rivojlanmoqda va jamoa so‘nggi mavsumdagi darajani saqlab qolish uchun bor kuchini ishga solyapti.
“Menimcha, hozir biz haqiqatan ham kuchli ‘Barselona’ haqida gapiryapmiz. O‘tgan mavsum juda yaxshi o‘tgandi va bu darajada davom etish har qanday jamoa uchun oson emas. Ular hozir to‘g‘ri yo‘lda va juda ishonchli ko‘rinib turibdi,” — dedi Alba.
Uning so‘zlariga ko‘ra, “blaugrana” murabbiyi Hans-Diter Flik klub uchun juda to‘g‘ri tanlov bo‘lgan. “Men Flikni shaxsan bilmayman, ammo uning ish uslubini kuzatib boraman. Uning taktik yondashuvi va jamoani boshqarish uslubi menga juda yoqadi. “Barselona”dagi ko‘pchilik futbolchilar bilan gaplashib turaman — ular ham Flik haqida faqat yaxshi fikr aytishadi,” — deb qo‘shimcha qildi u.
Tajribali himoyachi jamoadagi yosh avlodning o‘sishi va akademiyadan chiqqan futbolchilarning rolini ham alohida ta’kidladi. “Jamoada alohida sinf bor. Ular yangi transfer emas, balki klubning o‘z akademiyasi tarbiyalagan futbolchilar. Bu ‘Barselona’ uchun juda muhim omil, chunki klub har doim yoshlar orqali o‘z ruhini saqlab kelgan,” — dedi Alba.
Jordi Alba shuningdek, sobiq jamoasining ichki muhiti va birdamligi haqida ham to‘xtalib o‘tdi. Uning fikricha, “Barselona” hozir yoshlar va tajribali futbolchilar o‘rtasida muvozanatni topa olgan, bu esa klubni yana yuqori cho‘qqilarga olib chiqishi mumkin.
Eslatib o‘tamiz, Jordi Alba 2012-yildan 2023-yilgacha “Barselona” sharafini himoya qilgan. U jamoa bilan bir qator muhim sovrinlarni — La Liga, Chempionlar ligasi va Ispaniya kuboklarini qo‘lga kiritgan. Hozirda esa Alba AQSHning “Inter Mayami” klubida Lionel Messi va Serxio Buskets bilan bir jamoada o‘ynamoqda.
Albaning bu fikrlari “Barselona” muxlislari orasida katta qiziqish uyg‘otdi. Flikning yangi taktik yondashuvi va yoshlar bilan ishlash uslubi natijasida jamoa so‘nggi haftalarda yanada barqaror o‘yin ko‘rsata boshlagani ta’kidlanmoqda.
“Zamin”ni Telegramʻda oʻqing!
