11:36 / 31.10.2025

Rossiya va Evro-2032: Britaniya matbuoti yanglishdi

Britaniyaning Daily Mail nashri yana bir bor shov-shuvli maqola tayyorladi, ammo bu safar ham noto'g'ri ma'lumotlar bilan. Nashr Rossiya 2032-yilgi Yevropa chempionatini o'tkazishga ariza bergani haqida xabar tarqatdi.

Aslida esa bu gap haqiqatdan yiroq. Gap Rossiya futbol ittifoqi (RFI) prezidenti Aleksandr Dyukovning oddiy bir jumlasi noto'g'ri talqin qilinganida.

Rossiya – Boliviya (3:0) o‘yinidan keyin Dyukovga berilgan savolga u qisqa qilib: "Rossiya har doim tayyor" – deb javob berdi. Daily Mail esa bu gapni Rossiyaning Italiyani almashtirib, Evro-2032 mezbonligini qo‘lga kiritishga intilayotgani sifatida talqin qildi.

Nashr hatto Dyukovni "Moskva futbol federatsiyasi prezidenti" deb noto'g'ri tanishtirdi. Aslida Rossiya 2022-yilda Evro-2032 uchun ariza bergan edi, ammo o‘shandan beri hech qanday yangi hujjatlar yoki muzokaralar bo‘lib o‘tmagan.

RFI matbuot xizmati bu xabarni tasdiqlamadi va Daily Mail nashrining noto'g'ri talqin qilganini bildirdi. Shu bilan birga, Italiyada Evro-2032 bilan bog‘liq muammolar mavjud.

UEFA ma’lumotlariga ko‘ra, Italiyadagi 10ta stadiondan faqat bittasi turnir standartlariga mos keladi, qolganlari esa eskirgan. Turkiya bilan hamkorlik qilayotgan Italiya bu masalalarni hal qilishga ulgurishi lozim.

Rossiya esa hali ham zamonaviy stadionlari bilan futbol infratuzilmasiga ega davlat sifatida tan olinadi. 2018-yilgi Jahon chempionatiga tayyorlangan stadionlar foydalanishga shay.

Dyukovning "Rossiya har doim tayyor" degan so'zlari ham aynan shunga ishora qilgan edi. Britaniya matbuoti esa bu vaziyatni notoʻgʻri yoritib, Rossiyani Yevropa futbol maydonida qayta paydo boʻlmoqchi boʻlayotgandek tasvirladi.

Aslida esa futbol – sport bo‘lib, siyosiy vosita emas. Bugungi futbol jurnalistikasi ko‘pincha voqeani tahlil qilish o‘rniga shov-shuvli sarlavhalar bilan cheklanmoqda.

Rossiya esa o'z futbol infratuzilmasini rivojlantirishda davom etmoqda va katta musobaqalarni yana bir bor qabul qilishga tayyor.