Italiyada “Atalanta” klubida yana beqarorlik kuzatilmoqda — bu safar voqea markazida jamoa yetakchilaridan biri, nigeriyalik hujumchi Ademola Lukman turibdi. Goal Italia’ning yozishicha, Chempionlar Ligasi doirasidagi “Marsel”ga qarshi kechgan (0:0) uchrashuv paytida u bosh murabbiy Ivan Yurich bilan ochiqcha tortishuvga kirishgan.
74-daqiqada Yurich Lukmanni almashtirishga qaror qilganida, futbolchi bundan juda norozi bo‘ldi. U maydonni tark etayotgan chog‘da murabbiyga bir nechta gaplar aytgan, Yurich esa o‘z navbatida keskin javob qaytargan. Bir lahzada ikkisi o‘rtasida tortishuv avj olgan va yordamchi murabbiylar vaziyatni zo‘rg‘a tinchlantirishgan.
Uchrashuvdan so‘ng Ivan Yurich bu haqdagi savollarga javob berdi va “bu faqat hissiyotlar, boshqa hech narsa emas” deb izoh berdi. Biroq telekadrlarda vaziyatning jiddiyroq ko‘rinish olgani yaqqol ko‘rindi.
Ba’zi italiyalik jurnalistlarning ta’kidlashicha, bu holatning ildizi yozgi transfer oynasiga borib taqaladi. O‘shanda Lukman “Atalanta”ni tark etishni xohlab, bir necha kunlik mashg‘ulotlarga ham kelmagandi. Unga “Inter” klubi jiddiy qiziqish bildirgan, ammo bergamoliklar hujumchi uchun so‘ralgan narxni pasaytirishdan bosh tortgan. Shuning uchun transfer amalga oshmagan.
Shundan keyin Lukman jamoaga qaytib, so‘nggi sakkiz o‘yindan yettisini asosiy tarkibda o‘tkazgan va “Milan” darvozasiga muhim gol urgandi. Ammo “Marsel”ga qarshi bahsdagi mojaro Lukman va Yurich o‘rtasidagi munosabat hali ham to‘liq barqaror emasligini ko‘rsatmoqda.
Jurnalistlar ta’kidlashicha, agar bu nizo hal etilmasa, Lukmanning “Atalanta”dagi kelajagi shubha ostida qolishi mumkin. Shuningdek, qishki transfer oynasida u yangi jamoa topishi ehtimoldan xoli emas.
Kelgusi haftada “Atalanta” “Sassuolo”ga qarshi bahs olib boradi. Bu o‘yin Lukman uchun sinov bo‘ladi: u asosiy tarkibda maydonga tushadimi yoki yo‘qmi — aynan shu qaror uning jamoadagi mavqeini belgilab berishi mumkin.
Italiya sport matbuoti yozganidek, “Atalanta”da hozir ichki muhit tinch emas. Hujumdagi yetakchi bilan murabbiy o‘rtasidagi keskinlik klubning keyingi natijalariga ham ta’sir qilishi ehtimoldan xoli emas. Muxlislar esa bu vaziyat yaqin orada barqarorlashishiga umid qilmoqda.
“Zamin”ni Telegramʻda oʻqing!
