Rossiyaning Samara shahrida kecha katta qiziqish bilan kutilgan professional boks oqshomi bo‘lib o‘tdi. Turli vazn toifalaridagi janglar orasida eng katta e’tiborni vatandoshimiz — Ulug‘bek Sobirovning chempionlik jangi tortib oldi.
Ulug‘bek bugungi kunda o‘z vazn toifasida yuksak natijalar ko‘rsatayotgan, so‘nggi yillardagi o‘yinlarida bir necha bor raqiblarini erta muhlatda yenggan bokschi sifatida tanilgan. Bu safar u moldovalik tajribali raqib — Edgard Moskvichovga qarshi ringga chiqdi.
Jang super o‘rta vazn (76,2 kg) toifasidagi WBA ASIA chempionlik kamari uchun bo‘lib o‘tdi va u nafaqat O‘zbekiston, balki butun Markaziy Osiyo boks jamoatchiligi uchun muhim bellashuv sifatida ko‘rildi.
10 raund davom etgan bellashuv boshidan oxirigacha juda shiddatli ruhda kechdi. Ulug‘bek Sobirov birinchi daqiqalardanoq ustunlikni qo‘lga olib, tezkor zarbalar va aniq kombinatsiyalar orqali raqibini himoyada bo‘lishga majbur qildi. Moskvichov ba’zi raundlarda faollik ko‘rsatishga urindi, ammo o‘zbekistonlik bokschining ustun texnikasi va taktik tayyorgarligi g‘alabani ta’minladi.
Hakamlar yakunda bir ovozdan qaror chiqarishdi — Ulug‘bek Sobirov g‘olib, va endi u rasman WBA ASIA kamari sohibi. Bu natija uning professional ringdagi karerasidagi navbatdagi muhim qadam bo‘ldi.
Jangdan keyin Sobirov muxlislar oldida shunday dedi:
“Bu kamar men uchun emas, Vatanim uchun. Har bir zarbamda O‘zbekiston bayrog‘ini yuqori ko‘tarish maqsadi bor edi. Hozir ham yuragimda faqat minnatdorlik bor — menga ishonganlar, duo qilganlar va bu g‘alabaga hissa qo‘shgan har bir insonga rahmat.”
Mutaxassislar Sobirovning bu g‘alabasini uning xalqaro maydondagi yangi bosqichi deb baholamoqda. Endi u katta musobaqalar va nufuzli tashkilotlar ro‘yxatida yuqori o‘rinlar uchun kurash olib borishi kutilmoqda.
Samaradagi kecha esa nafaqat o‘zbekistonlik sportchi uchun, balki milliy boks maktabi nufuzi uchun ham esda qolarli voqeaga aylandi.
“Zamin”ni Telegramʻda oʻqing!
