Angliya Premer-ligasining 11-turida jahon futbolidagi ikki grand — “Manchester Siti” va “Liverpul” jamoalari o‘rtasidagi kutilgan to‘qnashuv oldidan asosiy tarkiblar e’lon qilindi. Bahsga hamisha bo‘lganidek katta qiziqish bilan tayyorgarlik ko‘rilmoqda, chunki bu ikki klubning o‘zaro uchrashuvlari so‘nggi yillarda chempionlik taqdirini belgilab bermoqda.
“Etihad” stadionida bo‘lib o‘tadigan bellashuvda “shaharliklar”ni Xosep Gvardiola boshqaradi. Ispaniyalik mutaxassis bu safar jamoasini quyidagi tarkib bilan maydonga tushiradi: darvozada Janluiji Donnarumma, himoyada Ruben Diash, Matey Nunesh, Joshko Gvardiol va Niko Oreyli. Yarim himoya chizig‘ini Bernardo Silva, Fil Foden va Niko nomli yosh iqtidor tashkil etadi. Hujumda esa Jeremi Dok-u, Rayan Cherki va to‘purar Erling Holandga ishonch bildirilgan.
Zaxirada esa Trafford, Reinders, Stouns, Ake, Marmush, Ayt-Nuri, Savino, Bobb va Lyuis kabi o‘yinchilar bor. E’tiborlisi, jamoa safida o‘zbekistonlik yosh himoyachi Abduqodir Husanov bu safar qaydnomaga kiritilmagan.
Shuningdek, “Liverpul” ham Arne Slot rahbarligida kuchli tarkib bilan maydonga tushadi. Darvozani Mamardashvili qo‘riqlaydi. Himoya chizig‘ida Van Deyk, Ibragim Konate, Robertson va Bredli to‘p tepadi. Yarim himoyada Virts, Sobosloi, Gravenberx va Mak Allister jamoa markazini boshqaradi. Hujum chizig‘ida esa Misr yulduzi Muhammad Saloh va Ekitiki joy olgan.
“Qizillar” zaxirasida Vudman, Gomes, Endo, Kerkez, Isak, Cheza, Jons, Gakpo va Ngumoxa kabi futbolchilar skameykada o‘tiradi.
Bu o‘yin nafaqat ochkolar uchun kurash, balki ikki jamoa o‘rtasidagi taktik shaxmatga aylanishi kutilmoqda. Har ikki klub hozirgi kunda yaxshi formada bo‘lib, chempionlik yo‘lida bir-birining kuchini sinab ko‘radi.
Bugungi to‘qnashuv “APL derbisi” sifatida butun dunyoda katta qiziqish uyg‘otmoqda — chunki maydonda jahon futboli yulduzlari, strategik mutaxassislar va g‘alabaga chanqoq ikki jamoa yuzma-yuz keladi.
“Zamin”ni Telegramʻda oʻqing!
