Krishtianu Ronaldu yana bir bor intervyu paytidagi samimiyligi va yumori bilan e’tiborni o‘ziga qaratdi. Suhbat davomida unga jurnalist tomonidan qiziqarli va bir oz hazilomuz savol berildi: agar u 1000-golini Jahon chempionati finalida ursa va shu bilan terma jamoani jahon chempioni qila olsa, bu haqda o‘zi tasavvur qilib ko‘radimi?
Ronaldu bu savolni eshitib, zavq bilan kulib yubordi va jurnalistga hazil bilan javob qaytardi. Uning aytishicha, bunday ideal ssenariy go‘yo Gollivud filmiga o‘xshab ketadi, lekin shu bilan birga futbolchi bu fikr unga motivatsiya va yaxshi kayfiyat ulashishini ham alohida ta’kidladi.
“Sizning savolingizdan shunday xulosa qilsa bo‘ladiki, siz juda ko‘p film ko‘rar ekansiz (kuladi). Albatta, bu juda chiroyli va afsonaviy manzara bo‘lardi. Lekin real hayotga qaytsak, bu gaplaringiz meni ruhlantiradi. Terma jamoa bitta o‘yinchiga bog‘liq emas, lekin bunday fikrlar doimo yoqimli”, — dedi u.
Ronaldu yana bir bor ta’kidladiki, Jahon chempionatida gol urish hamisha qiyin vazifa. Har bir raqibga qarshi marraga yetib borish katta kuch, sabr va omad talab qiladi. Shunga qaramay, u navbatdagi Mundialda maydonga tushish niyati qat’iy ekanini ochiq bildirdi.
“Keyingi chempionatda o‘ynashni istayman. Agar o‘ynash niyatim bo‘lmaganida, bu yerda ham bo‘lmasdim. Agar bu raqamlar, bu ’film’ real hayotda ro‘y bersa, ehtimol faoliyatimni eng yuqori nuqtada yakunlardim. Zarur bo‘lsa, albatta”, — dedi superyulduz.
Hozirgi vaqtda Ronalduning umumiy gollari soni 953 ta bo‘lib, u futbol tarixida eng yuqori ko‘rsatkichlardan birini qayd etib turibdi. Uning 1000-golgacha bo‘lgan masofasi qisqarib borayotgani ham muxlislarda alohida hayajon uyg‘otmoqda — chunki Krishtianudan qanday afsonaviy sahnalarni kutsa bo‘ladi, hech qachon oldindan ayta olmaysan.
Uning o‘zini ham kuldirgan “filmssenariy” esa, balki bir kuni haqiqatga aylanar — chunki Ronaldu bor joyda imkonsizdek tuyulgan voqealar ham real hayotda sodir bo‘lishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
