Sadio Mane “An-Nasr”dagi jamoadoshi Krishtianu Ronaldu haqida ochiq fikr bildirib, uning mehnatga bo‘lgan munosabati va yuksak professonalligiga alohida to‘xtalib o‘tdi. Senegallik hujumchining aytishicha, unda Ronaldu haqidagi tasavvurlar Saudiyaga kelgach yanada mustahkamlangan.
Mane yoshligidanoq portugaliyalik yulduzning o‘yinlarini TV orqali kuzatib borgan, uning mentaliteti va o‘z ustida ishlash madaniyati haqida ko‘p eshitgan. Lekin yuzma-yuz ko‘rishganida ham u aynan o‘sha professionallikni, intizomni va qat’iyatni ko‘rgan.
Uning ta’kidlashicha, Ronaldu nafaqat ulkan futbolchi, balki o‘zi bilan ishlashdan hech qachon charchamaydigan, har kuni o‘ziga yangi maqsad qo‘yadigan ajoyib inson. Yoshi 40 ga yaqinlashganiga qaramay, unda g‘alaba istagi, raqobatga chanqoqlik va yuqori darajada o‘ynashga bo‘lgan xohish hali ham so‘nmagan.
Rio Ferdinand bilan suhbatda sobiq “Manchester Yunayted” himoyachisi Ronaldu hali ham mashg‘ulotlarga birinchi kelib, oxirida ketadimi, deb so‘raganida Mane shunday javob berdi:
Uning fikricha, Ronaldu oldingi yillardagi kabi doimo birinchi kelmasligi mumkin, ammo baribir mashg‘ulot madaniyati uning qonida bor. U erta keladi, mahoratini sayqallaydi va boshqalar singari jamoaviy intizomga rioya qilib harakat qiladi. Eng muhimi esa — uning jamoaga ko‘rsatgan ta’siri. Mane bu ta’sirni “benazir” deb baholadi.
Senegallik hujumchining so‘zlariga qaraganda, Ronalduning maydondagi va mashg‘ulotdagi jonkuyarligi hamon barchaga namuna bo‘lib xizmat qilmoqda. Uning har bir kuni, har bir harakati va har bir qaroridan professional sportga xos jiddiylik bilinib turibdi.
Mane xulosa qilib, Ronaldu bilan bir jamoada o‘ynash har qanday futbolchi uchun ulkan tajriba va baxt ekanini ta’kidladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
