Farg‘onada bugun Superliganing 29-turidan o‘rin olgan qudratli va juda muhim bahs — “Neftchi” hamda “Qizilqum” o‘rtasidagi to‘qnashuv bo‘lib o‘tadi. Bu o‘yin oddiy tur uchrashuvi emas: agar farg‘onaliklar g‘alaba qozonishsa, jamoa 24-yillik tanaffusdan so‘ng nihoyat chempionlikni qo‘lga kiritadi. Shahar kayfiyati, muxlislar ruhi va stadion atrofidagi muhit bu kechani tarixiyga aylantirish arafasida turibdi.
Biroq raqib ham bunga qo‘l qovushtirib turmaydi. Championat.asia bosh muharriri Narzulla Saydullayev xabar berishicha, “Qizilqum” bugun maydonga shunchaki raqib sifatida chiqmaydi — ularga bu bahsda g‘alaba uchun katta rag‘bat puli va’da qilingan. Jamoa rahbariyati har bir futbolchiga 20 million so‘m mukofot belgilagan bo‘lsa, “Paxtakor” ham shu miqdorda qo‘shimcha va’da bergani aytilmoqda.
Shu tariqa, “Qizilqum” agar Farg‘onada sensatsiya qilishga muvaffaq bo‘lsa, futbolchilar bir o‘yinning o‘zida 40 million so‘mdan qo‘lga kiritishadi. Bu esa uchrashuvning ahamiyatini va raqobat darajasini yanada oshirib yuboradi.
Natija shuni ko‘rsatyaptiki, bugungi bahsda har ikki jamoa ham qattiq kurashga tayyor. “Neftchi” uchun bu — olamshumul 24-yillik orzu. “Qizilqum” uchun esa — juda katta moliyaviy imkoniyat va o‘zini ko‘rsatish bahonasi. Stadion atmosferasi esa allaqachon portlashga tayyor, Farg‘ona muxlislari esa bugun o‘z jamoasi bilan birga tarix yozishni kutyapti.
Eslatib o‘tamiz, “Neftchi” – “Qizilqum” uchrashuvi 16:15 da “Istiqlol” stadionida start oladi. Qolgani — 90 daqiqa va jamoalarning irodasi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
