Superliganing joriy mavsumi yakuniga bir qadam qoldi. Chempionat final bosqichiga kirib kelar ekan, futbol jamoatchiligi e’tiboridagi eng muhim savollardan biri — mavsumning eng yaxshi murabbiyi kim bo‘lishi. O‘zPFL ushbu nufuzli sovringa da’vogar nomzodlarni rasman e’lon qildi va ular atrofidagi qiziqish yanada kuchaydi.
Taklif etilgan ro‘yxatda mamlakat futbolida o‘z o‘rnini mustahkamlagan, jamoalarini barqaror natijalarga yetaklagan to‘rt murabbiy bor:
- Kamoliddin Tojiyev («Paxtakor»)
- Vadim Abramov («Dinamo»)
- Vitaliy Levchenko («Neftchi»)
- Ilyos Zeytullayev («Bunyodkor»)
Ularning har biri joriy mavsum davomida o‘z jamoasi bilan ezgu natijalarni qayd etib, chempionatga o‘zgacha ruh, o‘zgacha raqobat berishdi.
E’tirof etish kerakki, Vitaliy Levchenko boshchiligidagi «Neftchi» barvaqt chemionlikni qo‘lga kiritib, mavsumning eng barqaror va ishonchli jamoalaridan biri sifatida namoyon bo‘ldi. Uning taktik qarorlari, o‘yin boshqaruvi va jamoani psixologik jihatdan tayyorlashi ko‘pchilikning yuqori bahosiga sazovor bo‘ldi.
Shu bilan birga, Kamoliddin Tojiyev ham «Paxtakor» tarkibi bilan sezilarli natijalarga erishdi. U finalda «Buxoro» ustidan muhim g‘alaba qozonib, O‘zbekiston kubogini qo‘lga kiritdi va o‘z nomzodligini jiddiy asos bilan mustahkamladi.
Vadim Abramovning «Dinamo»si mavsum davomida bir necha murakkab uchrashuvlarda kuchli iroda va taktik barqarorlik namoyon etdi. Ilyos Zeytullayev esa yosh tarkibga tayanadigan «Bunyodkor»ni yaxshi o‘yinga yetaklab, sezilarli o‘sish ko‘rsatdi.
Hozirgi vaziyatda eng yaxshi murabbiy kim bo‘lishi haqida bahslar qizib borar ekan, nomzodlar har biri o‘z uslubi, ishlash metodikasi va jamoaga singdirgan ruhi bilan alohida e’tirofga loyiq.
Bu yilgi mukofot g‘olibining ismi katta ehtimol bilan mavsum yakunlanganidan so‘ng ma’lum qilinadi va futbol ishqibozlari bu jarayonni katta qiziqish bilan kuzatmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
