Angliya Premer-ligasida yana bir katta yangilanish e’lon qilindi — Transfermarkt ma’lumotlariga ko‘ra, chempionatda ishtirok etayotgan 543 nafar futbolchining bozor qiymati qayta hisoblab chiqildi. Umumiy qiymat 237,1 million yevroga pasayganiga qaramay, APL 12,53 milliard yevro bilan dunyoning eng qimmat va eng nufuzli chempionati sifatida o‘z pozitsiyasini mustahkam saqlab turibdi.
Bu safargi reytingda ayniqsa ikki futbolchi e’tibor markazida bo‘ldi. «Manchester Siti»ning joyida to‘xtamaydigan gol mashinasi — Erling Holand bozor qiymatini yana 20 million yevroga oshirib, 200 million yevro ko‘rsatkichiga yetdi va dunyodagi eng qimmat futbolchi maqomini mustahkamladi. Endi u mazkur ro‘yxat «tepasi»ni «Barselona»ning yosh superyulduzi Lamin Yamal bilan baham ko‘radi.
«Chelsi»ning braziliyalik yosh iqtidori Estevao ham o‘z narxini jiddiy ko‘tarib, londonliklar uchun yana bir quvonchli yangilik yaratdi. Umuman olganda, jamoaviy qiymat bo‘yicha ham eng katta o‘sish aynan «Chelsi»da kuzatildi.
Shuningdek, ushbu yangilanish mavsumni murakkab o‘tkazayotgan «Liverpul» uchun unchalik xushxabar bo‘lmadi — bir qator futbolchilarning qiymati sezilarli ravishda pasaydi.
Yangilangan ro‘yxatga ko‘ra APLning eng qimmat 10 futbolchisi quyidagicha:
1. Erling Holand — 200 mln yevro
2. Bukayo Saka — 130 mln yevro
3. Koul Palmer — 120 mln yevro
4. Deklan Rays — 120 mln yevro
5. Aleksandr Isak — 120 mln yevro
6. Florian Virs — 110 mln yevro
7. Moyses Kaysedo — 110 mln yevro
8. Rayan Gravenberx — 90 mln yevro
9. Uilyam Saliba — 90 mln yevro
10. Hyugo Ekitike — 85 mln yevro
Qizig‘i shundaki, Holand va Saka o‘rtasidagi 70 million yevroga teng tafovut liga tarixidagi eng yirik farq sifatida qayd etildi.
Premer-ligadagi raqobat shunchalik kuchliki, bozor qiymatlarining bunday keskin o‘zgarishi ham muxlislar o‘rtasida katta muhokamaga sabab bo‘lmoqda. Ligadagi yosh iqtidorlar, tajribali yulduzlar va taktik o‘zgarishlar har bir jamoaning aktivlari dinamikasiga beqiyos ta’sir ko‘rsatmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
