“Kristal Pelas”ning markaziy himoyachisi Mark Gexi yozgi transfer bozori oldidan Yevropa grandlari e’tiboriga tushdi. Ayniqsa, “Manchester Siti” uni o‘zining asosiy transfer maqsadlaridan biri sifatida belgilab olgani haqida xabarlar tobora kuchaymoqda. 25 yoshli Angliya terma jamoasi futbolchisining kelajagi esa hozirdanoq qizg‘in muhokama markazida.
Ma’lumotlarga ko‘ra, Gexi o‘tgan yozda “Liverpul”ga o‘tishi mumkin edi, ammo bu transfer turli sabablarga ko‘ra amalga oshmadi. Shu voqealardan keyin himoyachi 2026 yilning 30 iyuniga qadar amal qiluvchi shartnomasini uzaytirmaslikka qaror qildi. Bu esa uning “Kristal Pelas”ni shartnoma muddati tugagach, erkin agent sifatida tark etishi mumkinligini anglatadi.
“The Times” nashri yozishicha, “Manchester Siti” skautlari Gexining o‘yinini so‘nggi bir necha mavsum davomida muntazam ravishda kuzatib kelgan. Pep Gvardiola jamoasi yozda himoya chizig‘ini jiddiy ravishda yangilashni rejalashtirayotgan bir paytda, Mark Gexi aynan shu loyiha uchun eng mos nomzod sifatida qaralmoqda. Universal, jismoniy jihatdan barqaror va taktik jihatdan savodli himoyachi “Siti” uslubiga mos tushishi shubhasiz.
Ayni paytda “Manchester Siti” himoyasida bir qator savollar mavjud. Jon Stounzning shartnomasi yozgacha mo‘ljallangan bo‘lib, agar u sport formasini tiklab, barqaror o‘yin namoyish etsa, klub tomonidan yangi kelishuv taklif qilinishi mumkin. Natan Ake esa bu mavsumda Premer-ligada atigi bitta o‘yinni asosiy tarkibda boshlagan. Manuel Akanji hozirda “Inter”da ijarada to‘p suryapti. Har ikki 30 yoshli himoyachining yozda “shaharliklar” bilan xayrlashishi ehtimoli yuqori baholanmoqda.
Ana shu vaziyatda Mark Gexining transferi Pep Gvardiola uchun deyarli ideal yechim sifatida ko‘rilmoqda. Yosh, tajribali va hali o‘sish imkoniyatiga ega futbolchi jamoaning uzoq muddatli rejalariga to‘liq mos keladi. Biroq “Kristal Pelas” ham vaqtni cho‘zib o‘tirmoqchi emas. London klubi o‘yinchini tekin qo‘yib yubormaslik uchun uni qishki transfer oynasidayoq sotishga tayyor.
Qizig‘i shundaki, Gexiga bo‘lgan qiziqish faqat “Manchester Siti” bilan cheklanib qolmayapti. Bir nechta APL klublari va Yevropa jamoalari ham himoyachining vaziyatini diqqat bilan kuzatib turibdi. Demak, yoz yaqinlashgan sari Mark Gexi atrofidagi transfer kurashi yanada qiziydi. Muxlislar uchun esa bu navbatdagi katta intriga — “Siti” himoyasi yangi yetakchini qo‘lga kirita oladimi yoki yo‘q, buni vaqt ko‘rsatadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
