Myunxenning «Bavariya» klubi hujumchisi Xarri Keyn Germaniya chempionatida navbatdagi yorqin natija qayd etdi. Bundesliganing 15-turi doirasida «Xaydenxaym»ga qarshi o‘yinda gol urgan angliyalik forvard tarixiy rekord sohibi bo‘ldi.
Ushbu bahsdagi gol orqali Keyn Bundesligada gol + golli uzatma tizimi bo‘yicha 100 ochkolik marraga yetib keldi. E’tiborli jihati shundaki, bu natijaga erishish uchun 32 yoshli hujumchiga atigi 78 ta uchrashuv kifoya qildi. Bu esa 2004/05 yilgi mavsumdan beri rasmiy statistika yuritila boshlanganidan buyon eng tezkor ko‘rsatkich sifatida qayd etildi.
Avvalgi rekord niderlandiyalik yulduz Aren Robbenga tegishli bo‘lib, u 100 ochkolik chegarani 100 ta o‘yinda ortda qoldirgan edi. Xarri Keyn esa bu natijani ancha qisqa muddatda yangilab, Bundesliga tarixiga o‘z nomini oltin harflar bilan yozdirdi.
Ma’lumot o‘rnida, Keyn 2023 yil yozida «Tottenhem»dan «Bavariya» safiga ko‘chib o‘tgan edi. Qisqa vaqt ichida u jamoaning asosiy yetakchilaridan biriga aylanib ulgurdi.
Joriy mavsumda angliyalik strayker Bundesligada 15 ta uchrashuvda ishtirok etib, 19 ta gol urib va 3 ta golli uzatmani amalga oshirdi. Shuningdek, Yevropa Chempionlar ligasida ham yuqori samaradorlik namoyish etib, 6 ta o‘yinda 5 ta gol muallifi bo‘ldi.
Xarri Keynning bu formasi «Bavariya»ning chempionlik yo‘lidagi asosiy qurollaridan biri bo‘lib qolmoqda. Myunxenlik muxlislar esa uning yangi rekordlari hali oldinda ekaniga ishonch bilan qaramoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
