“Barselona” va Ispaniya milliy terma jamoasining yosh yulduzi Lamin Yamal muxlislarini yana bir bor samimiy javobi bilan hayratga soldi. Hujumchi uyida saqlanadigan eng qimmat buyumi haqida so‘ralganda, u hech ikkilanmasdan javob berdi.
— Uyimdagi eng qimmat narsa — Fransiya terma jamoasi darvozasiga kiritgan to‘pim, — dedi Yamal Daily Mail nashri jurnalistlariga.
Bu to‘p Yamal uchun oddiy esdalik emas. U Yevropa chempionati yarim finalida Fransiyaga qarshi o‘ta keskin bahsda urilgan, Ispaniyaga yo‘l ochib bergan tarixiy gol bilan bog‘liq. O‘sha bahsda ispanlar 2:1 hisobida g‘alaba qozongan bo‘lib, gollarga Lamin Yamal va Dani Olmo mualliflik qilgan edi.
Yarim finaldagi o‘sha g‘alaba Ispaniya terma jamoasi uchun hal qiluvchi burilish bo‘ldi. Finalda ham ispanlar Angliyani xuddi shu hisobda — 2:1 — mag‘lub etib, “Yevro-2024” musobaqasining bosh sovrinini qo‘lga kiritishdi.
Lamin Yamal uchun esa bu turnir faoliyatidagi eng yorqin bosqichlardan biriga aylandi. Hozirga qadar u Ispaniya milliy terma jamoasi safida 23 ta uchrashuv o‘tkazib, 6 ta gol muallifi bo‘ldi.
Yosh bo‘lishiga qaramay, Yamal allaqachon katta o‘yinlarda hal qiluvchi rol o‘ynay olishini isbotlab ulgurdi. Uning uyida saqlanayotgan o‘sha to‘p esa nafaqat bir golning, balki butun bir avlod umidlari va katta kelajakning ramzi sifatida qadrlanmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
