Saudiya Pro-ligasida 11-tur bahslari qizg‘in davom etmoqda. Peshqadam jamoalardan biri — «An Nasr» o‘z maydonida «Al Ohdud»ni qabul qilib, ishonchli va mukammal o‘yin namoyish etdi.
Uchrashuv to‘liq mezbonlar ustunligi ostida o‘tdi. Bellashuvning asosiy qahramoni esa an’anaga ko‘ra, jamoa sardori — Krishtianu Ronaldu bo‘ldi. Portugaliyalik yulduz birinchi bo‘limdayoq ikki marta raqib darvozasini ishg‘ol qilib, dubl muallifiga aylandi. Uning aniq zarbalari 31-daqiqa hamda birinchi taymga qo‘shib berilgan vaqtda tabloda aks etdi.
Uchrashuvga yakun yasagan gol esa so‘nggi daqiqalarda Feliks tomonidan kiritildi. Shu tariqa, «An Nasr» 3:0 hisobida g‘alaba qozonib, navbatdagi uch ochkoni qo‘lga kiritdi.
Bu dubl orqali Ronaldu professional faoliyatidagi gollari sonini 956 taga yetkazdi va yana bir bor o‘zining tarixiy natijalarini boyitdi.
Saudiya proligasi. 11-tur
An Nasr — Al Ohdud 3:0
Gollar: Ronaldu 31, 45+3, Felikc 90+4
An Nasr – Navaf, Sulton (Al Nassr, 69), Amri, Inigo Martines, Boushal, Brozovich, Angelo, Koman, Vesli (Al Haybari, 69), Feliks, Ronaldu.
Ushbu g‘alabadan so‘ng «An Nasr» ochkolari sonini 30 taga yetkazib, chempionat peshqadamligini saqlab qolmoqda. «Al Ohdud» esa 5 ochko bilan jadvalning quyi qismi — 17-pog‘onada qolib ketdi.
Saudiya Pro-ligasidagi bu kabi ishonchli g‘alabalar «An Nasr»ning chempionlik yo‘lidagi jiddiy da’volarini yana bir bor namoyon etmoqda. Muxlislar esa Ronaldu boshchiligidagi jamoadan yanada ko‘proq yorqin o‘yinlar kutmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
