Angliya chempionligi uchun jiddiy kurashayotgan “Manchester Siti” Premer-liganing 20-turida “Chelsi” bilan 1:1 hisobida durang o‘ynab, faqat ikki ochkoni yo‘qotib qo‘ymadi — jamoa uchun yanada og‘irroq yo‘qotish yuz berdi: ikki markaziy himoyachi — Yoshko Gvardiol va Ruben Diash uchrashuv davomida jarohat sabab maydonni tark etdi.
Ikki futbolchi ham o‘yin paytida zaxiraga olindi va ularning o‘rnini Abduqodir Husanov hamda Natan Ake to‘ldirdi. E’tiborli jihati — Gvardiol 51-daqiqada aynan Husanovga almashtirildi. Keyinchalik xorvatiyalik himoyachi chuqurlashtirilgan tibbiy ko‘rikdan o‘tkazilganida, uning o‘ng oyog‘i boldir suyagi singani ma’lum bo‘ldi.
Klub bayonotiga ko‘ra, Yoshko Gvardiol shu haftada operatsiya qilinadi. To‘liq tiklanish muddatini aniqlash uchun qo‘shimcha tekshiruvlar ham davom ettirilmoqda. “Klubdagi barcha Yoshkoga tezroq sog‘ayish tilaydi va ‘Manchester Siti’ uning reabilitatsiya jarayoni haqida muntazam ma’lumot berib boradi”, — deyiladi rasmiy xabarda.
So‘nggi ma’lumotlarga ko‘ra esa Gvardiol mavsumning qolgan qismini o‘tkazib yuborishi ehtimoli yuqori. Daily Mail nashri jurnalisti Jek Gogan ham shu mazmundagi ma’lumotni tasdiqlagani aytiladi. Bu esa “Siti” uchun oddiy jarohat emas, haqiqiy muammo: chunki Gvardiol oxirgi paytlarda Xosep Gvardiola tizimida himoya markazining tayanchlaridan biriga aylanib ulgurgandi.
Ekspertlar va Angliya futboliga yaqin manbalar qolgan bahslarda Gvardiolning asosiy o‘rnini ko‘proq Abduqodir Husanov to‘ldirishi kerakligini ta’kidlamoqda. Bu fikrni esteemedkompany.com sayti ham qo‘llab-quvvatladi. U yerdagi tahlilga ko‘ra, 23 yoshli xorvat himoyachining ishonchli o‘yini, pozitsiya tanlashi va to‘pni nazoratda ushlash qobiliyati “Siti” mexanizmida juda katta ahamiyatga ega bo‘lgan. Shu darajadagi futbolchining safdan chiqishi mavsum natijalariga ham ta’sir qilmasdan qolmaydi.
Eng achinarlisi, “Manchester Siti”da bu yo‘qotishga “moslashib olish” uchun vaqt deyarli yo‘q. Oldinda “Brayton” bilan bo‘ladigan qiyin uchrashuv kutib turibdi. Bunday paytda Gvardiola uchun har bir qaror — risk, har bir tanlov — mas’uliyat.
Ana shu nuqtada Husanov uchun eshik ochiladi. Yoshko Gvardiolning jarohati o‘zbek legioneriga o‘zini yanada kengroq ko‘rsatish, asosiy tarkibdagi o‘rnini mustahkamlash va jamoaga og‘ir damlarda yelka tutish imkonini beradi. Endi eng muhimi — bu imkoniyatni “bir-ikki o‘yinlik epizod” qilib qo‘ymasdan, doimiy ishonchga aylantirish.
Ma’lumot uchun, 21 yoshli Abduqodir Husanov joriy mavsum “Manchester Siti” safida Premer-liga, Angliya ligasi kubogi va Yevropa Chempionlar ligasida jami 10 marta maydonga tushgan. Iqtidorli himoyachi o‘ng qanotda ham, markazda ham ishonchli o‘ynay olishi bilan ajralib turadi.
Qisqasi, “Siti” uchun bu yangilik og‘ir, lekin futbolda har bir inqiroz — kimdir uchun yangi bosqich. Husanov uchun esa aynan hozir “men tayyorman” deb isbotlash vaqti. Muxlislar esa bitta narsani kutadi: u bu imkoniyatni ushlab qoladimi — yoki o‘tkazib yuboradimi.
“Zamin”ni Telegramʻda oʻqing!
