APLning 21-turida “Brayton”ga qarshi muhim bahs oldidan “Manchester Siti” bosh murabbiyi Xosep Gvardiola matbuot anjumanida qatnashdi. Jamoadagi jarohatlar “bosh og‘riq” bo‘lib turgan bir paytda, u qishki transfer rejalari, “Arsenal”ning kuchayishi va ayrim kadrlar atrofidagi muhokamalar bo‘yicha ham o‘z fikrini yashirmadi.
“Ruben Amorim — yuqori saviyadagi murabbiy”
Gvardiola “Manchester Yunayted” tomonidan qabul qilingan qaror haqida so‘ralganda, Amorimning murabbiy sifatidagi salohiyatini alohida ta’kidladi.
Uning aytishicha, qarorni qo‘shnilar — “Yunayted” rahbariyati qabul qilgan, shuning uchun u bunga aralashmaydi. Lekin Amorimga keyingi faoliyatida omad tilashni ham unutmadi:
“Ruben — katta darajadagi mutaxassis. Qarorni ‘Manchester Yunayted’ qabul qildi. Men esa unga kelajakda omad tilayman”.
Jon Stounz masalasi: “Hozircha aniqlik yo‘q”
Jamoa himoyasida muammolar ko‘paygan pallada, Jon Stounzning holati haqidagi savol tabiiy. Gvardiola bu borada hozircha qat’iy tashxis va aniq muddat ayta olmasligini bildirdi.
“Hozircha hech qanday aniq ma’lumot yo‘q. U yaqin o‘yinlarga tayyor emas”, — dedi u.
Bu gapdan bitta xulosa: “Siti” himoya chizig‘i hali bir muddat “qisqa odeyal” holatida qolishi mumkin.
Qishki transferlar: “To‘rt-beshta o‘yinchi emas”
Qishki oyna haqidagi savolga kelganda, Gvardiola muxlislar kutgan “katta xaridlar” ssenariyini sovutdi. U ayni paytda vaziyat o‘tgan mavsumdagidek emasligini, shuning uchun ommaviy transferlar kutilmasligini ochiq aytdi.
“Balkim, biror futbolchi qo‘shilishi mumkin. Lekin o‘tgan yildagidek bo‘lmaydi. Biz to‘rt yoki besh nafar o‘yinchini sotib olmaymiz — vaziyat tamoman boshqa”, — dedi mutaxassis.
Ya’ni, “Siti” bu qishda katta sarf-xarajat bilan bozorni “portlatish” rejasida emas, ehtimol — nuqtani kuchaytirish variantini ushlab turibdi.
“Arsenal” haqida: “Rostdan ham juda kuchli”
Chempionlik poygasida asosiy raqobatchi sifatida tilga olinayotgan “Arsenal” borasida Gvardiola ehtiyotkor, lekin juda hurmat bilan gapirdi.
“Juda kuchli jamoa. So‘nggi ikki-uch mavsumda ular tobora o‘sib, kuchayib bormoqda. Haqiqatdan ham juda baquvvat”, — deya baho berdi u.
Bu so‘zlar “Arsenal”ni kamsitish emas, aksincha — real vaziyatni tan olish. Chempionlikka ketayotgan yo‘lda shunday raqibga qarshi har bir ochko oltinga teng.
Jarohatlar va tarkib: “Bizda baza bor, faqat qaytadiganlar kerak”
Gvardiola yana bir muhim nuqtani urg‘uladi: mavsum oldi yig‘inida qanday tarkib bo‘lgan bo‘lsa, u shu jamoadan hozir ham mamnun. Muammo — aynan o‘sha tarkib to‘liq qo‘l ostida emasligida.
“Gvardiol, Ruben Diash va Jon Stounzning tezroq safga qaytishini istaymiz. Shuningdek, Afrikada bo‘lgan futbolchilarimiz ham ortga kelishi kerak. Bu davrdan omon o‘tib, keyingi bosqichga o‘tishni maqsad qilganmiz”, — dedi u.
Qisqasi, reja oddiy: bu og‘ir fazani “yiqilmasdan” o‘tib olish, saf qayta to‘ldirilganda esa yana to‘liq tezlikka chiqish.
O‘yin qachon?
Ma’lumot uchun, “Brayton” — “Manchester Siti” uchrashuvi ertaga Toshkent vaqti bilan 00:30 da start oladi.
Muxlislar uchun intriga tayyor: jarohatlar “Siti”ni sinovdan o‘tkazyapti, raqiblar esa kechirmaydi. Lekin Gvardiolaning kayfiyatidan bitta narsa sezildi — u hali ham bu mavsumda katta gap aytishga ishonib turibdi.
“Zamin”ni Telegramʻda oʻqing!
