Saudiya Arabistoni mezbonlik qilayotgan 23 yoshgacha bo‘lgan futbolchilar o‘rtasidagi Osiyo kubogida guruh bahslari qizishdan to‘xtamayapti. “B” guruhida ishtirok etayotgan O‘zbekiston U-23 terma jamoasi birinchi turni g‘alaba bilan boshlab, Livanni dramatik o‘yinda 3:2 hisobida mag‘lub etdi. Muxlislar uchun esa bu — “avval ishni qilib, keyin asabni sinab ko‘rish” degan klassik ssenariy bo‘ldi.
Uchrashuvda hisob 24-daqiqada ochildi: Amirbek Saidov o‘ziga xos ishonch bilan hujumni yakunlab, jamoamizni oldinga olib chiqdi. Birinchi goldan keyin ham O‘zbekiston bosimni tushirmadi — aksincha, tempni oshirib, o‘yinni o‘z qo‘lida ushlab turdi.
Ikkinchi taym boshlanishi bilan Ravshan Hayrullayev raqib mudofaasini yana bir bor “qulfsiz” ekanini ko‘rsatib qo‘ydi — 2:0. Oradan ko‘p o‘tmay, 57-daqiqada Sardor Bahromov chiroyli zarba bilan hisobni 3:0ga yetkazdi. Shu paytga kelib hamma “tayyor, bugun oson” deb o‘ylagandir, lekin futbol hech qachon film singari ssenariyga bo‘ysunmaydi.
Livan ham taslim bo‘lmadi. Ular Shaxin Leonardo Fara orqali bir gol bilan javob qaytarib, intrigani qayta tiriltirishdi. Eng qizig‘i esa oxirida bo‘ldi: hakam qo‘shib bergan daqiqalarda livanliklar yana bir bor darvozamizni ishg‘ol qildi — 3:2. Yaxshiyamki, vaqt ham, javob uchun imkoniyat ham ularga yetarli qolmadi.
Shunday qilib, Ravshan Haydarov shogirdlari 3 ochko bilan “B” guruhida turnir jadvalida peshqadamga aylandi. Guruhning ikkinchi o‘yini — Janubiy Koreya va Eron to‘qnashuvida esa gol ko‘rilmadi, bahs 0:0 hisobida yakunlandi. Bu natija O‘zbekiston uchun yanada qo‘l keldi: startda uch ochko — bu guruh yo‘lini ancha ochib beradi.
Endi asosiy vazifa oddiy: g‘alabani chiroyli boshlagan ekanmiz, davomini ham xuddi shunday “suvday” olib ketish kerak. Lekin oxirgi daqiqalardagi ikki gol shunga ishora qildi — himoyada “o‘yin tugadi” degan fikrga joy yo‘q. Musobaqa endi boshlandi, demak, oldinda yana katta imtihonlar turibdi.
U-23 Osiyo Kubogi
Guruh bosqichi. 1-tur
O‘zbekiston U-23 - Livan U-23 3:2
Ar-Riyod. "Shahzoda Faysal Bin Fahd" stadioni
Gollar: Amirbek Saidov (Sayidumar Saidnurullayev) 24, (1:0), Ravshan Xayrullayev 50 (2:0), Sardor Bahromov 58 (3:0), Leonardo Shahin 65, 90+5 (3:2)
O‘zbekiston: 21. Samandar Muratbayev, 2. Saidhon Hamidov, 4. G‘iyosjon Rizakulov, 6. Ravshan Xayrullayev ( 10. Rustambek Fomin,90+6), 7. Sardorbek Bahromov ( 3. Dilshod Murtazayev,86), 9. Saidumarxon Saidnurullayev, 11. Asilbek Jumayev, 16. Behruzjon Karimov (19. Muhammad-Bobur Karimov, 74), 17. Amirbek Saidov (23. Abdug‘afur Haydarov,74) 20. Dilshod Abdullayev, 22. Nurlan Ibrayimov (14. Azizbek To‘lqinbekov,86).
Zaxira: 1. Maksim Murkayev, 12. Umar Rustamov, 5. Ozodbek Ergashov, 8. Muhammedali Reimov, 13. Islom Anvarov, 15. Meyirbek Rejabaliyev, 18. Shoxjahon Yorqinboyev.
Livan U-23: 23. Antoni Masri, 3. Jad Viktor Smaira, 4. Hasan Farhat, 5. Muhammad Safvan, 6. Muhammad Gamluch (14. Xassan Fouani, 61), 7. Mahmud Zbib (18. Daniyel Istambuli,74), 8. Ali El Fadl (17. Shadi Jouni,83), 11. Ali Kasas, 16. Xodir Xaddur (2. Ali Alrida Ismail, 61), 19. Leonardo Shahin, 20. Nur Aude (10. Muhammad Sadek,61).
Zaxira: 1. Sharef Azaki, 9. Hassan Bazz, 12. Yusuf El Haji, 13. Xosein Reda, 15. Ibrahim Chami, 21. Mohammad Bou Saleh, 22. Zaher Al Amin.
Ogohlantirish: Mahmud Zbib (Livan) 39, Ali Kasas (Livan) 79, Jad Smaira (Livan) 85, Muhammad-Bobur Karimov (O‘zbekiston) 90+3.
“Zamin”ni Telegramʻda oʻqing!
