Madridning “Real” klubida yana bir katta “shov-shuvli yoz” hidi kelyapti. Klub rahbariyati bosh murabbiy Xabi Alonsoning ketishidan keyin jamoa ichidagi tartib va munosabatlar masalasini keskin qayta ko‘rib chiqyapti. OAVdagi ma’lumotlarga qaraganda, Alonso bilan ish jarayonida tortishuvlarga borgan hujumchi Vinisius Junior bilan ham xayrlashish varianti ko‘ndalang qo‘yilgan.
Ispaniya manbalari xususan DefensaCentral nashri “qirollik klubi” yozgi transfer oynasida Londonning “Arsenal”i bilan katta kelishuv ssenariysini tayyorlab qo‘yganini yozmoqda. Gap shundaki, “Real” “Arsenal”ning hujumkor futbolchisi Gabriel Martinellini o‘z safiga qo‘shib olishni xohlayotgani aytilmoqda.
Eng qizig‘i, bu rejani amalga oshirish uchun madridliklar Vinisiusni barter “kaliti” sifatida ishlatish variantini ham ko‘rib chiqishi mumkin. Manbada ta’kidlanishicha, Vinisiusning yangi shartnoma masalasini cho‘zib yuborishi ham rahbariyatni qattiq o‘ylantirayapti: agar kelishuv tezlashmasa, yozda katta qaror qabul qilinishi ehtimol.
Albatta, hozircha bu — rasmiy tasdiqlangan qaror emas, ko‘proq transfer gap-so‘zlari darajasida. Lekin “Real” ichida Alonso davridagi ziddiyatlar va kiyinish xonasidagi muhokamalar haqida turli xabarlar chiqqani, hatto ayrim yulduzlar bilan munosabatlar sovuqlashgani haqidagi materiallar bu ehtimolni “tamoman fantaziya”dan uzoqroq qiladi.
Statistikaga kelsak, joriy mavsumda 24 yoshli Gabriel Martinelli barcha musobaqalarda 24 ta o‘yinda 9 ta gol urib, 1 ta golli uzatma bergani keltirilmoqda. Vinisius Junior esa 27 ta uchrashuvda 6 ta gol va 8 ta assist qayd etgan.
Xulosa shunday: agar “Real” haqiqatan ham Vinisius bilan yo‘llarni ajratmoqchi bo‘lsa, bu yoz “oddiy transfer” emas — butun loyihaning yo‘nalishi o‘zgarishi bo‘ladi. “Arsenal” bilan barter esa Yevropa bozoridagi eng katta seriallarga raqobatchi: har seriyasida intriga, har safar “pauza”da esa yangi mish-mish.
“Zamin”ni Telegramʻda oʻqing!
