Turkiyada o‘quv-yig‘in mashg‘ulotlarini davom ettirayotgan «Neftchi» navbatdagi nazorat bellashuvida maydonga tushdi. Farg‘onaliklar yig‘in davridagi ikkinchi sinov uchrashuvini Sloveniyaning «Alyuminiy» klubiga qarshi o‘tkazib, muxlislarni quvontirgan natija qayd etdi — «chinorlar» 2:1 hisobida g‘alaba qozondi.
Uchrashuvning dastlabki daqiqalaridanoq «Neftchi» ancha faol harakat qildi va bu bosim tez orada samara berdi. 15-daqiqada Ikrom Aliboyev raqib darvozasini ishg‘ol etib, hisobni ochdi. Birinchi bo‘limda jamoa o‘yinni nazorat qilishga intildi, hujumlarda shiddat saqlandi, himoyada esa tartib buzilmadi.
Tanaffusdan keyin ham «Neftchi» o‘ziga xos ishonch bilan o‘yinni davom ettirdi. 58-daqiqada Jamshid Iskanderovning aniq zarbasi hisobni 2:0 ko‘rinishiga olib keldi. O‘yinning so‘nggi qismida «Alyuminiy» ham oldinga ko‘proq chiqishga urindi va 77-daqiqada Bloudek bir to‘p bilan javob qaytardi. Biroq qolgan vaqtda «chinorlar» vaziyatni sovuqqonlik bilan ushlab qolib, g‘alabani qo‘ldan chiqarmadi.
Bu bellashuv o‘quv-yig‘inning eng muhim jihatlaridan biri — tarkibni sinovdan o‘tkazish va turli kombinatsiyalarni tekshirish uchun yaxshi maydon bo‘ldi. Jamoa safida bir qator futbolchilar start tarkibda ko‘rindi, zaxiradan tushgan o‘yinchilar ham o‘yinga qo‘shilib, raqobat muhitini yanada oshirdi.
Nazorat uchrashuvi
Neftchi – Alyuminiy 2:1
Gollar: Ikrom Aliboyev 15, Jamshid Iskanderov 58 – Bloudek 77
Neftchi: Botirali Ergashev, Muhsin Ubaydullayev, Boyan Siger, Ibrohimhalil Yo‘ldoshev, Yovan Jokich, Abror Ismoilov, Jamshid Iskanderov, Ikrom Aliboyev, Alisher Odilov, Zoran Marushich.
Zaxiradan maydonga tushganlar: Ibrohim Shokirov, Nurmuhammad Abdug‘aniyev, Mo‘minxon Bahodirxonov, Xurshid G‘iyosov, Daler Tuxsanov, Farrux Sayfiyev, Vladimir Yovovich, Farhod Sohibjonov, Nurbek Sarsenbayev.
“Zamin”ni Telegramʻda oʻqing!
