Madridning «Real» klubi vingeri Vinisius Junior «Levante»ga qarshi o‘yindan (2:0) keyin jamoani tark etish istagini yaqinlariga bildirgani aytilmoqda. La Liganing 20-turi doirasidagi ushbu bahsda «qaymoqranglilar» muxlislari braziliyalik futbolchini deyarli har bir to‘pga tegishida hushtakbozlik bilan kuzatgan. Bu haqda El Periodico nashri xabar bermoqda.
Manbaga ko‘ra, aynan shu holat Vinisius uchun “so‘nggi tomchi” bo‘lgan. Futbolchi tribunalardagi munosabatdan charchagani, klub uchun qilgan mehnati va xizmatlari yetarlicha qadrlanmayotganini his qilayotgani ta’kidlanadi. Ya’ni muammo faqat o‘yindagi epizodlar emas — ruhiy bosim va doimiy tanqidning yig‘ilib borgani haqida gap ketyapti.
«Meni xohlamaydigan jamoada o‘ynashni istamayman», — deya Vinisiusning agentlariga aytgan gaplarini keltiradi manba. Bu iboraning o‘ziyoq vaziyat qanchalik og‘irlashganini ko‘rsatadi: gap shunchaki emotsiyada emas, qarorga yaqin kayfiyatda.
Vinisius Junior 2018 yildan buyon «Real» sharafini himoya qilib kelmoqda. Joriy mavsumda u barcha musobaqalarda 29 ta o‘yinda maydonga tushib, 6 ta gol va 8 ta assist qayd etgan. Futbolchining klub bilan amaldagi shartnomasi 2027 yil yozigacha mo‘ljallangan. Transfermarkt ma’lumotiga ko‘ra, uning bozor qiymati 150 million yevroni tashkil etadi.
Hozirgi holatda eng qiziq savol shu: «Real» bu ruhiy jarohatni “ichkaridan” davolay oladimi yoki vaziyat chuqurlashib, katta transfer hikoyasiga aylanadimi? Chunki tribuna bilan munosabat buzilsa, hatto eng kuchli futbolchi ham o‘zini yolg‘iz his qila boshlaydi. Vinisius masalasida esa bu allaqachon “hissiyot” emas, juda jiddiy signalga o‘xshayapti.
“Zamin”ni Telegramʻda oʻqing!
