UEFA Chempionlar ligasi doirasida Norvegiyaga safar qilgan «Manchester Siti» «Budyo-Glimt»ga qarshi uchrashuvda klub tarixidagi o‘ziga xos rekordni qayd etdi. «Shaharliklar» mazkur bahsda Chempionlar ligasi tarixidagi eng yosh start tarkib bilan maydonga chiqdi.
Opta statistik mutaxassislari keltirgan ma’lumotlarga ko‘ra, ushbu o‘yinda «Siti»ning asosiy tarkibining o‘rtacha yoshi 24-yil 84 kunni tashkil etgan. Bu esa manchesterliklarning Chempionlar ligasidagi barcha ishtiroklari orasidagi eng yosh start tarkib sifatida ro‘yxatga kiritildi. Ya’ni, Gvardiola jamoasi Norvegiyada faqat o‘yin emas, bir vaqtning o‘zida kelajakka ishora qiluvchi tajriba ham o‘tkazdi desa bo‘ladi.
Albatta, bunday yosh tarkib bilan maydonga tushish har doim ham oson kechmaydi. Ayniqsa, sovuq havo, safar atmosferasi va «Budyo-Glimt»ning o‘z maydonidagi jangovor ruhi fonga chiqqan paytda. O‘yin jarayonida mezbonlar bundan unumli foydalanishga harakat qildi va natijada «Manchester Siti» mazkur bellashuvda 1:3 hisobida mag‘lub bo‘ldi.
Shunga qaramay, bu statistika «shaharliklar» uchun muhim signal: klub Chempionlar ligasida natija uchun kurash bilan birga, yangi avlodni ham katta sahnaga chiqarishga jiddiy urg‘u beryapti. Demak, bugungi “og‘riqli” saboq ertangi katta g‘alabalar uchun poydevor bo‘lishi mumkin.
“Zamin”ni Telegramʻda oʻqing!
