Antaliyada yangi mavsumga puxta tayyorgarlik ko‘rayotgan «Paxtakor» yig‘in doirasidagi dastlabki nazorat uchrashuvida maydonga tushdi. «Sherlar» Shimoliy Makedoniya yuqori divizionida 2-o‘rinda borayotgan «Struga»ga qarshi bahsda murosa yo‘lini tanlab, 1:1 hisobida durang qayd etdi.
Bu o‘yin «Paxtakor» uchun yig‘indagi birinchi jiddiy sinovlardan biri bo‘ldi. Jamoa Turkiyadagi mashg‘ulotlar orqali jismoniy tayyorgarlikni ham, taktik bog‘lanishlarni ham bir vaqtning o‘zida “tishlab” olishni maqsad qilgan. Shu ma’noda, «Struga» kabi tartibli va jismonan baquvvat raqibga qarshi bahs murabbiylar shtabi uchun ham kerakli xulosalarga boy kechgani tabiiy.
Ushbu o‘rtoqlik uchrashuvi orqali «Paxtakor» ikki xil tarkibni ham sinovdan o‘tkazdi. Birinchi taymda maydonga tushgan asosiy tarkibda Sanjar Quvvatov, Dilshod Saitov, Shahzod Azmiddinov, Dilshod Abdullayev, Hojiakbar Alijonov, Quvonshbek Saydaliyev, Abubakir Shukurullayev, Jamshid Rustamov, Bashar Resan, Dostonbek Hamdamov va Davron To‘laganov o‘yinni boshladi.
Ikkinchi bo‘limda esa Maksim Murkayev boshchiligidagi tarkib maydonga chiqib, jamoaning zaxiradagi imkoniyatlari va yangi bog‘lanishlarini ko‘rsatishga harakat qildi.
Paxtakor (ikkinchi bo‘limdagi tarkib): Maksim Murkayev, Zaid Tahsin, Muhammadali Dilshodbekov, Sherzod Nasrullayev, Bobur Muhammad Karimov, Sardor Mirqobilov, Sardor Sobirxo‘jayev, Behruz O‘ktamov, Hojimat Erkinov, Yaxyo O‘rinboyev, Azizbek Turg‘unboyev.
Qayd etish lozim, «Paxtakor»ning Antaliya yig‘ini 30-yanvargacha davom etadi va shu vaqt ichida jamoa yana ikki marta o‘rtoqlik o‘yini o‘tkazishi rejalashtirilgan. Bu bahslar orqali «sherlar» mavsum oldidan ritmni ushlab olish, raqobat muhitini kuchaytirish va asosiy tarkib uchun eng to‘g‘ri variantni shakllantirishni ko‘zlamoqda.
Avvalroq klub bir qator futbolchilar bilan yangi shartnoma imzolagani haqida xabar berilgandi. Demak, jamoa nafaqat yig‘indagi o‘yinlar, balki tarkibiy barqarorlik nuqtayi nazaridan ham yangi mavsumga jiddiy kirib kelyapti.
“Zamin”ni Telegramʻda oʻqing!
