Ispaniya chempionatining 21-turi doirasida “Real” safarda “Vilyarreal”ni 2:0 hisobida mag‘lub etib, navbatdagi muhim uch ochkoni qo‘lga kiritdi. Ushbu bahsdan keyin “qirollik klubi” bosh murabbiyi Alvaro Arbeloa jamoaning hujum chizig‘idagi yetakchilari Kilian Mbappe va Vinisius Juniorning hozirgi holati, mehnati va jamoaga foydasi haqida o‘z fikrlarini bildirib o‘tdi.
Arbeloaning ta’kidlashicha, bu ikki futbolchi hozirgi kunda dunyodagi eng kuchlilar qatorida emas, balki aynan eng yuqori pog‘onada turadi. Chunki ular bir lahzaning o‘zida o‘yin manzarasini o‘zgartirib, raqib rejasini yirtib tashlashga qodir.
Murabbiyning so‘zlariga ko‘ra, “Real” imkoni boricha to‘p nazoratini ushlab turishga intiladi. Bu uslubda Vinisius qanotda to‘pni qabul qilib, yakkama-yakka vaziyatlar yaratishi, Mbappe esa bo‘sh hududlarga chaqqon yugurishlar bilan himoya ortiga kirib borishi jamoa uchun hal qiluvchi qurolga aylanmoqda. Arbeloa bu yerda “yangi gap” qidirmaganini ham ochiq aytdi: muxlislar bu ikki yulduzning nimalarga qodir ekanini allaqachon biladi.
Biroq murabbiyni eng ko‘p quvontirgan jihat — ularning faqat mahorat emas, mehnat bilan ham jamoaga yetakchilik qilayotganidir. Arbeloa Mbappe va Vinisiusning jamoaga sadoqatini alohida urg‘uladi: ular birinchi bo‘lib pressing boshlaydi, yarim himoyachilar bilan uzviy harakat qiladi, har bir epizodda jonbozlik ko‘rsatadi, zarur paytda orqaga qaytib ham ishlaydi.
“Real” muxlislari uchun eng yoqimlisi shuki, bu mehnat o‘z samarasini beryapti: gollar kelyapti, g‘alabalar davom etyapti, jamoaning hujumdagi kuch-qudrati yanada oshyapti. Arbeloa esa ayni paytdagi forma va munosabatdan to‘liq mamnun ekanini yashirmadi.
Qisqasi, “Real”ning bugungi yuzi — nafaqat to‘pni to‘rga kirita oladigan yulduzlar, balki har bir daqiqada jamoa uchun ishlaydigan, maydonda mas’uliyatni his qiladigan liderlar. Mbappe va Vinisius hozir ana shunday qiyofada ko‘rinayapti.
“Zamin”ni Telegramʻda oʻqing!
