Arsenalning sobiq futbolchisi Rober Pires Chempionlar ligasi qurasi vaqtida to'plarni tortdi. Marosim oldidan fransuz Yevropaning eng nufuzli klublar turnirida London jamoasining hozirgi mavqeini yuqori baholadi. Bu haqda euro-football.ru xabar beradi.
«Arsenal Chempionlar ligasining favoritlaridanmi? Ha. Ular sakkizta o'yinning barchasida g'alaba qozondi, 23 ta gol urdi va atigi to'rttasini o'tkazib yubordi. Mikel Arteta hamda futbolchilarning ishi zo'r», — dedi Pires.
Umumiy bosqichda 24 ochkodan 24 ochko to'plagan «kanonirlar» Chempionlar ligasining 1/8 finaliga to'g'ridan to'g'ri yo'l oldi. Keyingi raqib sifatida ularga «Borussiya», «Atalanta», «Olimpiakos» yoki «Bayer» tushishi mumkin.
Arsenalning Chempionlar ligasidagi eng yaxshi natijasi — 2006 yilgi final. O'shanda londonliklar «Barselona»ga 1:2 hisobida imkoniyatni boy bergan.
“Zamin”ni Telegramʻda oʻqing!
