O‘zbekiston milliy terma jamoasi bosh murabbiyi Fabio Kannavaro Braziliyaga tashrif buyurib, Rio-de-Janeyrodagi Braziliya Futbol Konfederatsiyasi (CBF) qarorgohida Braziliya terma jamoasi ustozi Karlo Anchelotti bilan uchrashdi. Bu haqda CBF rasman ma’lum qildi.
Konfederatsiya ijtimoiy tarmoqdagi sahifasida uchrashuv haqida qiziq tarzda xabar berdi: “Qarang, bugun CBF qarorgohiga kim tashrif buyurdi!” degan mazmundagi post orqali muxlislar diqqati tortildi. Unda Kannavaroni Anchelotti hamda erkaklar terma jamoalari bo‘yicha koordinator Rodrigo Kaetano qabul qilgani qayd etildi.
Ma’lum qilinishicha, uchrashuv juda iliq va samarali kayfiyatda o‘tgan. Futbolning ikki yirik namoyandasi bir stol atrofida o‘tirib, shunchaki oddiy suhbat emas, balki katta tajriba va qarashlarga boy muloqot olib borgan. Asosiy mavzular orasida futbolning bugungi tendensiyalari, Jahon chempionatiga tayyorgarlik, o‘yin uslubi va strategiyalar, shuningdek terma jamoalarni rivojlantirishga oid fikr almashinuv bo‘lgani ta’kidlandi.
E’tiborli tomoni, ayni paytda har ikki mutaxassis ham jamoasini mundialga tayyorlash jarayonida band. Shu ma’noda, bu uchrashuv “muxlislar uchun chiroyli kadr”gina emas, balki katta futbol oshxonasida bo‘layotgan fikr va tajriba almashinuvning yorqin ko‘rinishi sifatida ham baholanmoqda.
Qisqasi, Kannavaro va Anchelottining bunday do‘stona muloqoti — futbolda chegara yo‘qligini, katta maqsadlar oldida esa tajriba, bilim va g‘oyalar har doim muhim ekanini yana bir bor ko‘rsatdi.
“Zamin”ni Telegramʻda oʻqing!
