O‘zbekiston futboli uchun yana bir yorqin xabar: "Manchester Siti"dagi hamyurtimiz Abduqodir Husanov yanvar oyi yakunlari bo‘yicha klubning “oy futbolchisi” deb topildi. Bu mukofot g‘olibi murabbiylar shtabi emas, aynan muxlislar ovozi bilan belgilanishi esa bu yutuqqa alohida qadr qo‘shadi.
Klub rasmiy manbasi ta’kidlaganidek, Husanov yanvar oyida juda barqaror o‘yin namoyish etdi va oy davomida 7 ta uchrashuvda maydonga tushib, turli himoya sheriklari bilan birga ishlab, jamoaning orqasini “tikilgan”day mustahkamlab berdi. Mukofot uchun kurashda u jamoadoshlari — Bernardu Silva va Janluiji Donnarummani ortda qoldirdi.
Bu yerda eng yoqimli jihati — Husanovning “ko‘zga yaqqol tashlanmaydigan, lekin jamoani saqlab turadigan” ishi. Gol urib, sarlavhaga chiqish har kimning qo‘lidan keladi. Ammo himoyada o‘z vaqtida to‘xtatish, pozitsiyani yo‘qotmaslik, duellarda qattiq turish — bu chempionlik yo‘lida “ko‘rinmas ochko” olib keladi.
Eslatib o‘tamiz, Husanov Fransiyaning "Lans" klubidan “Siti”ga 2025-yil yanvarda qo‘shilgan, shartnomasi 2029-yil yozigacha mo‘ljallangan.
Albatta, oldinda yanada katta sinovlar ko‘p. Lekin shunaqa oylik mukofotlar futbolchiga ham, muxlisga ham bitta signal beradi: yo‘l to‘g‘ri, temp yaxshi, ishonch bor. Qisqasi, Husanovning formasi “yanvarda qizidi”, endi esa bahorda ham maydonda muz emas, olov kutamiz.
“Zamin”ni Telegramʻda oʻqing!
