Kataloniyaliklar Markus Reshford masalasida nuqta qo‘yishga yaqin. Diario Sport xabariga ko‘ra, "Barselona" rahbariyati hujumchini jamoada saqlab qolishga qaror qilgan va uni to‘liq transfer qilish variantini ishga tushirishni rejalashtiryapti.
Manba ma’lumoticha, klub Markus Reshford uchun 30 million yevro miqdoridagi sotib olish shartini faollashtiradi. Futbolchining o‘zi bilan esa 3-yillik bitim imzolanishi kutilayapti. Shu bilan birga, maosh masalasida ham “yumshatish” bo‘lishi mumkin — ya’ni maosh biroz qisqartirilishi ehtimoldan xoli emas.
Eslatib o‘tamiz, Reshford hozirda "Manchester Yunayted"dan ijara asosida “Barsa” safida to‘p tepyapti. Angliya klubi ham Markus bilan xayrlashishga qarshi emas — demak, muzokaralarda “qarshilik devori” yo‘q, faqat shartlarini to‘g‘ri joyiga qo‘yish qolgan, xolos.
Maydondagi ko‘rsatkichlar esa qarorning be’jiz emasligini ko‘rsatyapti: hujumchi bu mavsum La Ligada 20 o‘yin o‘tkazib, 4 ta gol urdi va 6 ta golli uzatma berdi. Ya’ni, u “faqat nom” emas — amalda ham foyda beryapti: harakat, tezlik, pas va oxirgi zarbada ishonch.
Agar bu kelishuv amalga oshsa, “Barselona” bir narsani aniq tanlayapti: qisqa muddatli ijara emas, uzoqroq loyiha. Muxlislarga esa bunday xabar yoqadi — chunki yangi mavsumgacha “Reshford qoladimi, ketadimi?” degan serial nihoyat finalga yaqinlashyapti.
“Zamin”ni Telegramʻda oʻqing!
