Saudiya Arabistoni Professional ligasi transfer bozorida yana bir katta “portlash” tayyorlayapti. Manbaga ko‘ra, saudiyaliklar “Liverpul”ning eng samarali hujumchisi Muhammad Salohni olib kelish uchun unga hozirgi maoshidan uch baravar yuqori maosh berishga ham tayyor.
Bunday shov-shuvli rejalarning ortida bir katta xavotir bor: ayni paytda liganing asosiy “magniti” — Krishtianu Ronaldu ketib qolishi mumkinligi haqidagi gap-so‘zlar kuchayib ketdi. Saudiyaliklar esa bu ssenariy amalga oshsa, chempionatning global qiziqishini pasaytirib qo‘ymaslik uchun yangi superyulduzni olib kirishga harakat qilmoqda.
Ronaldu atrofidagi vaziyat nima uchun xavfli?
Ma’lumotlarga qaraganda, “An-Nasr”da haftasiga 3,35 million funt sterling atrofida daromad qilayotgan Ronaldu liga va klubdagi transfer siyosatiga nisbatan noroziligini ochiqroq bildira boshlagan. 41 yoshli portugaliyalik yulduz faoliyatidagi “1000 gol” marrasiga yetish uchun Yevropa tomon qaytish variantini ham ko‘rib chiqishi mumkin, degan xavotirlar bor. Saudiyada esa “Ronaldu ketsa, shou kim bilan davom etadi?” degan savol havoda ilinib qolgan.
Shu nuqtada Saloh varianti yanada “issiq” ko‘rina boshladi. Chunki misrlik yulduz — ham brend, ham gol, ham reklama, ham muxlis. Qisqasi, liga uchun tayyor paket.
Salohga qancha pul taklif qilishyapti?
Hozir “Liverpul”da Saloh haftasiga 400 ming funt sterling maosh oladi. Saudiyaliklar esa 33 yoshli hujumchiga bu raqamdan uch baravar ko‘proq, ya’ni haftasiga taxminan 1,2 million funt atrofida maosh berishga tayyor. Bu haqda Daily Mirror eksklyuziv materialda yozgan.
Yana bir muhim jihat: mavsum tugagach, Saloh shartnomasining yakunlanishiga 12 oy qoladi. Demak, vaqt o‘tib ketsa, “Liverpul” uni yo tekinga yo‘qotish yoki hozir pullab qolish degan qattiq qarorga borishiga to‘g‘ri kelishi mumkin.
Nega Saudiya Salohni “umid” deb ko‘rayapti?
Avvalroq Muhammad Saloh saudiyaliklar tomonidan kelgan takliflarni bir necha bor rad etgani aytilgan. Lekin joriy mavsumda uning o‘yinida ma’lum bir pasayish kuzatilgani, shuningdek, “Liverpul” bosh murabbiyi Arne Slot bilan munosabatlarida mojaro haqidagi mish-mishlar “sheyxlar”da umid uyg‘otmoqda: ya’ni bu gal qaror boshqacha bo‘lishi mumkin.
Albatta, bu yerda hali ham ko‘p narsa noaniq: Salohning shaxsiy rejalari, “Liverpul”ning pozitsiyasi va eng muhimi — Ronalduning keyingi qadami. Ammo bitta narsa aniq: Saudiya ligasi hozir “yulduzlar yo‘qolib ketmasin” degan rejimda harakat qilyapti.
Muxlislar uchun esa hozirgi intriga shunday: Ronaldu ketadimi-yo‘qmi, Saloh keladimi-yo‘qmi — lekin pul degan “transfer tili”da Saudiya hali ham eng baland ovozda gapiradi.
“Zamin”ni Telegramʻda oʻqing!
