8 fevral kuni Angliya Premyer-ligasining 25-turi doirasida «Liverpul» «Enfild»da «Manchester Siti»ni qabul qildi. Uchrashuv keskin va ehtiyotkor ohangda o'tdi, yakunda esa «shaharliklar» 2:1 hisobida irodali g'alabani olib ketdi. Bu haqda euro-football.ru xabar beradi.
Arne Slot hamda Xosep Gvardiola jamoalari so'nggi haftalarda beqaror natijalar fonida maydonga tushdi. Shu bois bu bahs har ikki murabbiy uchun ham prinsipial ahamiyat kasb etdi va o'yin ko'proq “futbol shaxmati”ga o'xshab ketdi.
Uchrashuv boshidayoq «Siti» vaziyat yaratdi: 3-daqiqada Bernardo Silva Holannni Alisson bilan yakkama-yakka chiqardi, ammo norveg hujumchisi zarbasini darvozabon qaytardi. Keyinroq Holann pasidan keyin Marmush jarima nuqtasi atrofida noaniq zarba berdi, ustiga-ustak epizod ofsayd bilan yakunlandi.
Birinchi bo'limda xavfli hujumlar kam bo'ldi: ikki jamoa ham xatardan qochdi, to'p nazorati ko'p, lekin yakunlovchi zarbalar yetishmadi. Tanaffusdan keyin «Liverpul» faollashdi, «Siti» esa biroz ortga chekina boshladi.
Mezbonlar ketma-ket imkoniyatlarga ega bo'ldi: Ekitike Virtsning uzatmasidan so'ng darvozani nishonga ola olmadi, oradan yetti daqiqa o'tib esa Salohning krossidan keyin ham fransuz hujumchisi ustun yonidan o'qqa tutdi. «Liverpul» bosimi oxiri samara beradigandek ko'rindi.
So'nggi 15 daqiqalik boshida Gravenberh darvozaga ro'para, taxminan 30 metrlar atrofida jarima zarbasini ishlab berdi. To'p yoniga kelgan Dominik Soboslai ajoyib zarba yo'llab, to'pni o'ng ustunga tekkizgan holda tarmoqqa joyladi — 1:0.
Biroq Soboslaining “mo'jiza goli” mezbonlarga qimmatga tushdi. 85-daqiqalar atrofida o'ng qanotdan tashlangan oddiy to'p rikoshetdan so'ng Holannga kelib tushdi, u esa chiroyli tarzda Bernardo Silvuga oshirdi. Portugaliyalik futbolchi shpagatda zarba berib, hisobni tenglashtirdi — 1:1.
Qo'shib berilgan dastlabki daqiqada Alisson autdan keyingi uzatmaga yugurib chiqqan Matyus Nunisni yiqitib qo'ydi. Uzoq bahs-munozaralardan so'ng penalti belgilandi va Holann uni aniq ijro etdi — 1:2.
Oxirida «Liverpul» yana bosim qildi: Donnarumma Mak Allisterning kuchli zarbasini darvoza to'sini ostidan qaytarib qoldi. Uchrashuv yakunida Sherkining goliga o'xshash epizod bo'ldi, ammo hujum boshida qoida buzilgani sabab gol bekor qilindi, Soboslai esa qizil kartochka oldi. Shu tariqa «Manchester Siti» «Enfild»dan irodali g'alaba bilan qaytdi.
“Zamin”ni Telegramʻda oʻqing!
