Futbol eksperti Dmitriy Bulykin «Yevro-Futbol.Ru»ga bergan eksklyuziv intervyusida FIFA prezidenti Janni Infantinoning Rossiyaga qoʻyilgan taqiq bo‘yicha fikrlari hamda OAVda tarqalgan XOQ yaqin kelajakda rossiyalik sportchilarga qo‘yilgan sanksiyalarni bekor qilishi mumkinligi haqidagi xabarlarga munosabat bildirdi. Bu haqda euro-football.ru xabar beradi.
Bulykinning aytishicha, 2028 yilga kelib rossiyaliklarni musobaqalarga qaytarish g‘oyasi muhokama qilinmoqda. U futbol ham bundan chetda qolmasligini xohlashini, eng muhimi jarayon imkon qadar tezlashishini ta’kidladi. Shu bilan birga, u Belarus terma jamoasi bilan o‘yinlardan bosh tortish holatlarini salbiy misol sifatida eslatib, masala maydonda kuchni isbotlash orqali hal bo‘lishi kerakligini qayd etdi.
Estoniya va Litvaning o‘smirlar jamoalari Belarus bilan o‘ynashdan bosh tortgani uchun texnik mag‘lubiyat olgani yuzasidan esa Bulykin UYEFAning bunday qarorini zarur choraga yo‘ydi. Uning fikricha, ko‘plab jamoalar o‘ynashni istamayotgan bir paytda muammoni aynan shunday qat’iy pozitsiya bilangina jilovlash mumkin.
XOQ sanksiyalarni bekor qilsa, FIFA va UYEFA ham shu yo‘ldan boradimi, degan savolga Bulykin ehtiyotkorona javob berdi: u Olimpiya o‘yinlari va futbolning mexanizmlari turlicha ekanini, shu sabab avtomatik “zanjirli reaksiya” bo‘lishiga uncha ishonmasligini aytdi. Biroq Rossiya uchun har ikki yo‘nalishda ham musobaqalarga tezroq qaytish muhimligini qo‘shimcha qildi.
Infantino Rossiya jamoalarini chetlatishni “ma’nosiz” deb atagani haqida gapirar ekan, Bulykin FIFA rahbari bu mavzuda ko‘p bor gapirayotganini, ammo hozircha amaliy qaror ko‘rinmayotganini bildirdi. Shunga qaramay, u yaqin orada vaziyat “o‘lik nuqta”dan siljishi va rossiyalik sportchilar bayroq hamda madhiyasi bilan musobaqalarga qaytishiga umid qildi.
Infantino kelajakda siyosat sabab jamoalarni musobaqalardan chetlatishni qonunan taqiqlash kerakligini aytgani borasida ham Bulykin bu tashabbusni qo‘llab-quvvatlashini ma’lum qildi. Uning so‘zlariga ko‘ra, futbol aslida siyosatdan tashqarida bo‘lishi kerak, biroq hozir nimagadir siyosiy omil birinchi o‘ringa chiqib qolgan.
Bulykin taqiq qachon olib tashlanishi mumkinligi haqida uzoq cho‘zilmasligiga ishonishini aytdi. U avvalo o‘smirlar va ayollar terma jamoalarini musobaqalarga qaytarish katta qadam bo‘lishini, ammo eng to‘g‘risi barcha jamoalarga bir vaqtning o‘zida ruxsat berilishi ekanini ta’kidladi.
2026 yilda buni amalga oshirish qanchalik real, degan savolga esa u buni qilish juda qiyin bo‘lishini, shunday bo‘lsa-da, ijobiy yakunga umid doim borligini bildirdi.
“Zamin”ni Telegramʻda oʻqing!
