Holann gol urishdagi pasayishdan norozi ekanini tan oldi

«Manchester Siti»ning markaziy hujumchisi Erling Holann o‘zining so‘nggi o‘yinlardagi samaradorligi haqida fikr bildirdi. Bu haqda euro-football.ru xabar beradi.

Norvegiyalik forvard 2026 yilda barcha musobaqalarni qo‘shib hisoblaganda 12 uchrashuvda atigi uch marta raqib darvozasini ishg‘ol qildi.

«Menga yanada jam bo‘lish, hamma jihatdan yaxshiroq harakat qilish kerak — shu ustida ishlashim shart. Nega natijalarim yaxshi bo‘lmagani haqida gapirishni istamayman. Menimcha, bunga hech qanday bahona yo‘q», — deya Holannning so‘zlarini ESPN keltirdi.

Joriy mavsumda 25 yoshli hujumchi barcha turnirlarda 36 o‘yinda maydonga tushib, 28 ta gol va 6 ta golli uzatma muallifiga aylandi. Holannning «Manchester Siti» bilan shartnomasi 2034 yilgacha amal qiladi.