La Liganing 23-turida «Vilyarreal» – «Espanol» uchrashuvi noodatiy ssenariyda kechdi: 87-daqiqagacha har ikki jamoa jamlab atigi uch marta darvoza to'riga aniq zarba bergan bo'lsa-da, tablodagi hisob 4:0 edi. Bu haqda euro-football.ru xabar beradi.
O'yin boshida mehmonlar Tyreis Dolan uzatmasidan keyin Omar el-Hilali orqali sakkiz metr masofadan gol urgandek bo'ldi, biroq hujumdagi qoida buzilishi qayd etilib, gol bekor qilindi. 35-daqiqada «Vilyarreal» hisobni ochdi: chap qanotdan uzatma uzoq ustunga bordi, Teyjon Byukenen to'pni Jorj Mikautadzega oshirdi va u burilib turib, havodan o'ng yuqori burchakka aniq zarba yo'lladi — 1:0. Oradan ko'p o'tmay Alberto Moleyro jarima maydoniga yorib kirib, markazga pas uzatdi, Xose Salinas uzatmani to'smoqchi bo'lib, to'pni o'z darvozasiga kiritib yubordi — 2:0.
Ikkinchi bo'lim boshida Moleyro markazdan Nikolya Pepeni oldinga tashladi, Pepe jarima maydoniga kirib borib 15 metr masofadan pastdan o'ng burchakka aniq tepdi — 3:0. Ko'p o'tmay Moleyro Mikautadzedan pas olib, 12 metrdan uzoq burchakka yo'llagan zarbasi bilan hisobni yiriklashtirdi — 4:0. Yakunda «Espanol» Pol Losano orqali uzoqdan xavfli urindi, darvozabon vaziyatni qutqardi, ammo 88-daqiqada burchak zarbasidan keyin Sharl Pikelning uzatmasini Leandro Kabrera boshi bilan golga aylantirdi — 4:1.
Shu g'alaba «Vilyarreal»ga turnir jadvalida uchinchi o'rindagi «Atletiko»ga yetib olish imkonini berdi. «Espanol» esa ketma-ket to'rtinchi mag'lubiyatidan so'ng oltinchi pog'onada qolmoqda.
“Zamin”ni Telegramʻda oʻqing!
