«Barselona» sport direktori Deku 2024 yilda Hans-Diter Flikning bosh murabbiy etib tayinlanishi ortida qanday mantiq yotganini tushuntirib berdi. Uning aytishicha, Xavidan keyin klubga eng birinchi navbatda jamoa ichiga xotirjamlik va muvozanat olib kira oladigan, ayniqsa yoshlar ko‘p bo‘lgan kiyinish xonasini to‘g‘ri boshqaradigan murabbiy kerak edi.
Deku ta’kidlaganidek, «Barselona»da har doim o‘ziga xos muhit bo‘lgan: katta bosim, baland talab, bir vaqtning o‘zida yoshlarga ishonch va natijaga majburiyat. Hozir esa shu muhit yanada barqaror, “muvozanatli” tus olayotganini aytdi. Qisqasi, klubdagi asosiy maqsad — maydondagi o‘yinni emas, jamoa ichidagi tartib va kayfiyatni ham boshqara olish.
Chunki tarkib juda aralash: bir tomonda — yosh futbolchilar, boshqa tomonda — tajribali va yetakchilikni bera oladigan figuralar. Deku misol sifatida Rafinya, Frenki de Yong va Jyul Kundeni tilga oldi. Shuningdek, Robert Levandovski ham jamoada bor. Yana bir muhim nuqta: hozir ijarada bo‘lsa-da, sardorlardan biri sanaladigan Mark-Andre ter Stegen ham klub uchun yetakchi figuralar qatorida qolmoqda.
Dekuga ko‘ra, ana shunday kiyinish xonasini boshqarish — katta san’at. Muvaffaqiyat kaliti esa yirik klublar muhitida ishlagan, bosimni ko‘rgan, katta maqsadli jamoani tartibga sola oladigan murabbiy tanlashda bo‘lgan. Va bu yerda Flikning tajribasi hal qilgan:
- Germaniya milliy jamoasida yordamchi bo‘lib ishlagan,
- g‘olib jamoa muhitida tajriba orttirgan,
- yillar davomida yuqori darajada murabbiylik qilgan.
Ya’ni klub Flikni “faqat taktika” uchun emas, balki jamoa psixologiyasi, intizom va boshqaruv madaniyati uchun ham tanlagan. Dekuning gapidan chiqqan xulosa shu: «Barselona»da ba’zan eng qiyin vazifa — raqibni emas, o‘zingni bosimdan to‘g‘ri olib o‘tish.
Eslatib o‘tamiz, Flik avval Germaniya milliy jamoasi va «Bavariya»da ishlagan. Ayni paytda esa «Barselona» La Liga turnir jadvalida 58 ochko bilan peshqadam bo‘lib turibdi. Demak, klub qilayotgan tanlov “qag‘ozda chiroyli” emas, hozircha natija bilan ham o‘zini oqlayapti.
