Hafta o'rtasida "Atletiko" Kubokda "Barcelona"ni 4:0 hisobida tor-mor etib, Yevropa futbolini hayratga solgandi. Biroq yakshanba kungi chempionat bahsida "matrasniklar" "Rayo Valyekano"ga qarshi uchrashuvda mutlaqo kutilgan darajani ko'rsata olmadi. Bu haqda euro-football.ru xabar beradi.
O'yin avvalida mezbonlar darvozasi yaqinida xavfli vaziyat yuzaga keldi: Nobyel Mendi to'pni o'z darvozasi tomon yo'naltirib yuborib, u yuqori to'singa tegdi. Standart vaziyatdan so'ng Tiago Almadaning qisqa uzatmasidan keyin Aleks Baenaning "to'qqizlik"ka yo'llagan zarbasi nishonga biroz aniq bormadi. Boshqa epizodda Alfonso Espino jarima maydonchasi ichidan past zarba berdi, darvozabon esa to'pni burchakka chiqarib yubordi.
40-daqiqada "Rayo" hisobni ochdi: o'ng qanotda Andrey Ratyu raqibini aldab o'tib uzatma berdi, Fran Peres esa past zarba bilan Oblak darvozasini ishg'ol qildi — 1:0. Oradan ko'p o'tmay "Atletiko" o'z jarima maydonchasi oldida to'pni boy berdi va mezbonlar buni darhol jazoladi: Ilyas Axomash uzatma berdi, Isi Palason zarba yo'lladi, darvozabon qaytargan to'pni Oskar Valentin darvozaga "mixlab" qo'ydi — 2:0.
76-daqiqada "ariqlar" yana standartdan foydalandi: chap qanotdagi burchak zarbasidan keyin Alvaro Garsiya uzoq ustunga osma uzatma berdi va Nobyel Mendi bosh bilan hisobni yiriklashtirdi — 3:0. "Atletiko" ham burchak zarbasidan javob qaytarishga urindi: Xulian Alvares oshirdi, Xose Ximenes yaqin masofadan to'pni darvozaga yo'naltirdi, biroq darvozabon jamoasini qutqarib qoldi.
Shu tariqa "Rayo Valyekano" ketma-ket uch mag'lubiyatdan iborat seriyasiga nuqta qo'ydi va turnir jadvalida 15-o'ringa ko'tarilib oldi. "Atletiko" esa uchinchi o'rinni raqiblari bilan bo'lishib turibdi.
“Zamin”ni Telegramʻda oʻqing!
