2025/26 yilgi mavsum Yevropaning bir qator grandlari uchun asabiy o‘tmoqda: ayrim klublar allaqachon bosh murabbiyni almashtirdi, boshqalari esa bunga juda yaqin. «Yevro-Futbol.Ru» mavsum davomida top-klublardan ketgan mutaxassislarni eslab, keyingi bo‘lishi mumkin bo‘lgan nomlarni ham tilga oldi. Bu haqda euro-football.ru xabar beradi.
Ruben Amorimning «Manchester Yunayted»dagi davri nihoyat yakunlandi. 41 yoshli portugaliyalikning iste’fosi haqida yozda ham gaplar ko‘p edi, biroq klub rahbariyati oxirigacha unga ishonch bildirdi. 5 yanvar kuni vaziyat o‘zgardi: autsayderlarga qarshi ikki o‘yinda bor-yo‘g‘i ikki ochko olingach, Amorim bilan xayrlashildi. Va bu qaror o‘zini oqlayotgandek: vaqtincha tayinlangan Maykl Kerrik darhol natija bera boshladi — «Manchester Siti» ustidan 2:0, safarda «Arsenal»ga qarshi 3:2, keyin «Fulhem» (3:2) va «Tottenhem» (2:0). Faqat «Vest Hem» bilan 1:1 durang qayd etildi, biroq jamoa allaqachon APLda 4-o‘rin bilan Chempionlar ligasi zonasinda.
«Chelsi»da esa Enso Mareskaning ishdan olinishi ko‘pchilik uchun mantiqsiz ko‘rindi. Tarkib yosh, yulduzlar deyarli yo‘q bo‘lsa-da, italiyalik murabbiy ikki sovrinni qo‘lga kiritdi — Konferensiyalar ligasi va Klublar o‘rtasidagi jahon chempionati. APLda ham jamoa muntazam tarzda Chempionlar ligasi yo‘llanmasi uchun kurashdi. Xorij OAVlariga ko‘ra, masala natijalarda emas: Mareska klubning transfer siyosati va kam tanilgan yosh futbolchilarga tayanish g‘oyasini to‘liq qo‘llab-quvvatlamagan. Yil boshidan beri «Chelsi»ni Liam Rozenor boshqarmoqda, natijalar esa hozircha o‘zgaruvchan.
APLdagi eng yangi iste’fo «Tottenhem»da ro‘y berdi. 11 fevral kuni londonliklar yozda kelgan Tomas Frank bilan hamkorlik muddatidan avval tugatilganini e’lon qildi. «Shporlar» mavsum oxirini kutmadi: muammolarga to‘la «Nyukasl»dan uyda 1:2 hisobida yutqazilgach, murabbiy mavsum o‘rtasidayoq ketdi. Jarohatlar ko‘pligi va superyulduzlar yo‘qligiga qaramay, 16-o‘rinda yurish klub darajasi uchun og‘ir ko‘rinadi. Frank o‘rniga Igor Tudor tayinlandi — «Yuventus»dagi omadsiz tajribasi fonida bu tanlov ham bahsli.
Tudorning «Yuventus»dagi faoliyati ham alohida tilga olinadi: xorvatiyalik 2025 yil martidan oktyabrigacha turinliklarni boshqardi. Dastlabdayoq uning kelishi xato bo‘lishi mumkinligi haqida fikrlar paydo bo‘lgan, ammo rahbariyat unga yig‘in o‘tkazib, mavsumni boshlash imkonini berdi. Biroq vaqt o‘tishi bilan «keksa sinora»ning o‘yini yanada susaydi va iste’fo mantiqiy yakun bo‘ldi. Eng qiziq tomoni — Tudor o‘rniga kelgan Luchano Spalletti aniq topilma bo‘lib chiqdi: sobiq «Napoli» va Italiya terma jamoasi ustozi «Yuventus»ni tezda Chempionlar ligasi kurashiga qaytardi.
«Real»da Xabi Alonso bilan xayrlashish ham kutilmagan qarorlardan biri bo‘ldi. Mareskadagidek, bu yerda ham natijadan ko‘ra ichki muhit ko‘proq rol o‘ynagandek: manbaga ko‘ra, Alonso futbolchilar bilan umumiy til topa olmadi. Yulduzlar qat’iy intizom, yuqori pressing va to‘liq nazoratga ko‘nikmagan, natijada ispan murabbiyi o‘z falsafasini jamoaga singdira olmadi. «Real»ga ko‘pincha taktikadan ham ko‘ra Karlo Anchelotti yoki Zinedin Zidan kabi so‘zini o‘tkaza oladigan avtoritet kerakligi yana bir bor eslatildi.
«Monako»da Adi Hyutter ham lavozimidan ketdi. Nemis mutaxassisi 2023 yilda kuchli start olgan, bir paytlar hatto «PSJ»ga chempionlik poygasida raqobat bo‘lishi mumkin degan taassurot uyg‘otgan edi. Chempionlik bo‘lmadi, lekin Hyutterni to‘liq muvaffaqiyatsiz deyish qiyin: u jamoani ketma-ket ikki marta Chempionlar ligasiga olib chiqdi, bu Aleksandr Golovin davrida klub uchun tarixiy natija sifatida ko‘riladi. Shunga qaramay, joriy mavsum starti omadsiz kechgach, murabbiy iste’foga chiqarildi. Uning o‘rniga 38 yoshli Sebastyen Pokonoli tayinlandi, u esa yaqindagina Belgiya tashqarisida deyarli ishlamagan edi.
Keyingi iste’foga eng yaqin nom sifatida aynan Pokonoli tilga olinmoqda. U Fransiyada izga tushira olmayapti, «Monako» futbolchilarining ko‘pchiligi yangi murabbiy qo‘l ostida keskin pasaygan, Golovin ham bundan mustasno emas. Shunga qaramay, rossiyalik yarim himoyachi baribir maydonda eng ko‘zga ko‘ringanlardan biri bo‘lib qolmoqda. Rossiya terma jamoasi bosh murabbiyi Valeriy Karpin ham Golovinning o‘yinini stadionda kuzatib, ayni pallada uni «Monako»dagi eng yaxshilardan biri sifatida tilga olgan.
«Liverpul»da Arne Slotning taqdiri ham savol ostida. Manbaga ko‘ra, u klubda asosan o‘tgan yili qo‘lga kiritilgan chempionlik hisobiga qolayotgandek: agar o‘shanda oltin medal bo‘lmaganda, niderlandiyalik allaqachon jamoani tark etgan bo‘lardi. Rahbariyat yangi futbolchilarga katta mablag‘ sarflagan bir sharoitda, Slotdan ancha barqaror va yuqori natija kutilyapti.
Ro‘yxatni «Nyukasl» ustozi Eddi Hау bilan yakunlaymiz. Qanchalik yoqimli mutaxassis bo‘lmasin, manbaga ko‘ra, ajralish vaqti kelgandek: himoyadagi muammolar hal bo‘lmayapti, Isaak ketganidan keyin hujum chizig‘i ham izdan chiqqan. Ko‘plab jarohatlar va moliyaviy cheklovlar vaziyatni og‘irlashtirmoqda. Ustiga ustak, yozda klub rekord darajadagi 75 million yevroga hujumchi Nik Voltemadeni olib kelgan, u esa «Aston Villa»ga qarshi so‘nggi o‘yinga qadar 13 uchrashuv ketma-ket gol ura olmagan edi.
Dmitriy Milyayev
“Zamin”ni Telegramʻda oʻqing!
