La Liganing 24-turida “Barselona” safarda “Jirona”ga 1:2 hisobida mag‘lub bo‘lib, muhim ochkolardan quruq qoldi. Uchrashuvdan keyin kataloniyaliklar bosh murabbiyi Hans-Diter Flik o‘yin haqida ochiq va qat’iy fikr bildirdi — u bu safar bahona qidirmadi, aksincha raqibning g‘alabasini to‘liq e’tirof etdi.
Mutaxassisning ta’kidlashicha, “Jirona” maydonda g‘alabaga haqiqatan munosib bo‘lgan. Flik “Barselona”ning eng katta muammosi aynan himoyada ko‘ringanini alohida urg‘uladi. Ayniqsa, qarshi hujumlar paytida jamoa raqibga haddan tashqari katta hudud va erkinlik berib qo‘ygan.
“Jirona bugun g‘alabaga loyiq edi. Biz juda yomon himoyalandik, ayniqsa qarshi hujumlar vaqtida raqibga juda katta kenglikni taqdim etdik”, — degan mazmunda fikr bildirdi Flik.
Uning so‘zlariga ko‘ra, muammo faqat ortda emas, markazda ham sezilgan. Bosh murabbiy yarim himoya chizig‘i kutilgan darajada ishlamaganini, o‘yinni boshqarish va tempni nazorat qilish masalasida jamoa o‘z talabiga javob bermaganini ham qayd etdi.
“Bugun yarim himoyachilarimiz biz istagan o‘yini ko‘rsatishmadi”, — dedi u.
Ushbu mag‘lubiyatdan keyin “Jirona” 29 ochko bilan turnir jadvalida 12-o‘rinda qoldi, “Barselona” esa 58 ochko to‘plab, ikkinchi pog‘onada turibdi. Bir qarashda joyi o‘zgarmagan bo‘lishi mumkin, lekin bunday o‘yinlar chempionlik poygasida “qimmatga tushadigan” kechalardan bo‘ladi.
Flikning chiqishi esa muxlislarga bitta narsani anglatadi: jamoa muammolarni ko‘rib turibdi va ularni yashirish niyati yo‘q. Endi eng muhimi — keyingi turlarda shu xatolardan to‘g‘ri xulosa chiqarish va ayniqsa qarshi hujumlardagi bo‘shliqlarni yopish. Chunki La Ligada kechirim kam, raqib esa har bir ochiq zonadan foydalanib qoladi.
