Londonning «Arsenal» klubida 2019 yildan beri bosh murabbiy masalasida o‘zgarish bo‘lmadi, biroq so‘nggi haftalarda Mikel Arteta atrofida iste’fo haqidagi gaplar yanada kuchaydi. Manbalarga ko‘ra, agar «kanonirlar» navbatdagi mavsumda ham chempionlikni qo‘lga kirita olmasa, mavsum yakunida klub ispan mutaxassisi bilan xayrlashishi mumkin. Bu haqda euro-football.ru xabar beradi.
Shu fon’da «Arsenal»ni kim boshqarishi mumkinligi haqida turli taxminlar yangramoqda. Quyida Arteta o‘rniga ko‘rilayotgan eng qiziqarli variantlar keltiriladi.
Xabi Alonso
Agar Alonso «Real»da kutilgan darajada yurishmagan bo‘lsa ham, bu uning boshqa loyiha va ligalarda muvaffaqiyat qozona olmasligini anglatmaydi. «Arsenal» uslub, intizom va aniq futbol falsafasini talab qiladigan klub sifatida Alonso uchun hatto Madrid klubidan ham mosroq ko‘rinadi. Uning Leverkuzenning «Bayer»i bilan qilgan ishlari hamon yodda: jamoa butun mavsum davomida juda kam mag‘lubiyat ko‘rgan, o‘yin sifati esa ko‘pchilikni hayratda qoldirgandi.
Sesk Fabregas
38 yoshli Fabregas Yevropada tez o‘sayotgan yosh murabbiylardan biri sifatida tilga olinmoqda. Uning qo‘l ostida Italiyaning «Komo»si mavsum sayin kuchayib bormoqda: elitaga qaytganidan keyingi ilk mavsumdan so‘ng jamoa endi yevrokuboklar uchun kurashni maqsad qilgan. Fabregasni «Barselona» ham kuzatayotgani aytiladi, ammo u faoliyatining muhim qismini aynan «Arsenal»da o‘tkazgani sabab, Londondagi tayinlov ham mantiqan to‘g‘ri qadam bo‘lishi mumkin.
Vensan Kompani
«Kanonirlar» uchun yana bir jozibali nomzod — 39 yoshli Kompani. U «Bavariya» bilan endigina ikkinchi mavsumini o‘tayotgan bo‘lsa-da, myunxenliklar allaqachon Chempionlar ligasining asosiy favoritlari qatorida tilga olinmoqda. Katta klubda ishlash har kimning ham qo‘lidan kelavermaydi — buni yaqin o‘tmishda Tomas Tuxel misolida ham ko‘rish mumkin. Kompanini «Manchester Siti» ham Gvardiolaga ehtimoliy o‘rinbosar sifatida kuzatmoqda, biroq «Arsenal» bu poygada chaqqonroq bo‘lishga urinishi ehtimoldan xoli emas.
Antonio Konte
«Arsenal» rahbariyati Artetadan norozi bo‘lishining asosiy sababi bitta — chempionlikning yo‘qligi. Klub nazarida APLdagi bir necha bor ikkinchi o‘rinlar, shuningdek kubok va superkuboklar chempionlik bilan tenglasha olmaydi. Agar «kanonirlar»ga aynan hozir va tezkor natija kerak bo‘lsa, Konte eng mos variantlardan biri: u ko‘pincha ilk mavsumdayoq jamoaga natija olib kiradi. Biroq italiyalik mutaxassisning keskin fe’l-atvori keyinchalik rahbariyat bilan ziddiyatlarga olib kelishi ham mumkin — shunga qaramay, faqat sovrin talab qilinayotgan vaziyatda Konte juda kuchli kandidat.
“Zamin”ni Telegramʻda oʻqing!
