Ispan futbolida bir odat bor: «Barselona» darvozasi tomon bahsli epizod yuz bersa, Kataloniya efirida shovqin ko'tariladi. La Liganing 24-turida ham shu manzara takrorlandi. «Jirona» 2:1 hisobida yutdi, 86-daqiqada Klaudio Echeverri Jyul Kunde oyog'iga shiplar bilan kirib bordi, VARdagi David Galves Raskon esa vaziyatga xotirjam qarab, bosh hakam Sesar Soto Grado'ni monitorga chaqirmadi. Oradan ko'p o'tmay Fran Beltran g'alaba golini urdi va bahs alangasi yondi. Bu haqda euro-football.ru xabar beradi.
Shu fon’da El Chiringuito jurnalisti Jota Jordi keskin bayonot berdi: «Biz madridistlar va ularning ta’siri boshqarayotgan la’nati ligani tark etishimiz kerak. Dog' tushgan chempionlikdan ko'ra hurmat muhim», degan mazmunda.
Gap jarangdor, ammo real hayotda bu pokerda yomon karta kelganda «stol adolatsiz» deb turib ketishga o'xshaydi. Muammo shundaki, «uyga ketish» varianti yo'q: boshqa La Liga mavjud emas, Superliga esa amalda tug'ilmasidan so'ndi.
Eng muhim savol: «Barselona» umuman chempionatni tark eta oladimi? Texnik, huquqiy va amaliy tomondan olganda — yo'q. Katalon klubi bunday ekzistensial qadam ko'taradigan ahvolda emas: milliardga yaqin qarz, «Kamp Nou» atrofidagi muammolar, oylik maoshlar, shartnomalar va mart oyida bo'lishi kerak bo'lgan prezidentlik saylovi bor.
Flik matbuot anjumanida mas'uliyatni o'z zimmasiga oldi. Rafinya ijtimoiy tarmoqlarda «ikki xil mezon» haqida yozdi, ammo yakunda baribir: «Yashasin Barca», degan ruhda tugatdi.
Bu — «qamal qilingan qal’a» uslubidagi ritorika. Ligani tark etish chaqiriqlari ko'proq siyosiy hissiyot, bo'shliqqa aytilgan qichqiriq. Oradan ko'p o'tmay hamma yana navbatdagi o'yin haqida o'ylaydi, xuddi hech narsa bo'lmagandek.
Biroq mojaroni ham inkor etib bo'lmaydi. Ispaniyada rasmiylar Echeverrining qoidani buzganini tan oldi, VAR aralashishi shart bo'lganini qayd etdi va Beltran goli bekor qilinishi kerakligini bildirib, Galves Raskon'ni alohida ko'rsatmagacha chetlatdi.
Shu bilan birga, o'sha uchrashuvda «Barselona» o'z darajasida ishonchli ko'rinmadi: jadvalda 12-o'rinda turgan «Jirona» juda ko'p xavfli vaziyatlar yaratdi. Flik hakamlik ortiga berkinmadi va ochiq gapirdi: «Jirona» g'alabaga loyiq. Ayniqsa, himoya va o'tishlarda juda yomon o'ynadik», dedi.
U hakamlar tomon ham achchiq kinoya qoldirdi: «Ular ham biz o'ynagan darajada ishladi. Unchalik yaxshi emas», deya baho berdi.
«Barselona»ning sobiq futbolchisi Igor Korneev esa yanada to'g'ridan-to'g'ri xulosa qildi: «Himoyada bunday o'ynab bo'lmaydi. «Jirona» epchilroq bo'lganida, yana ko'proq urardi».
Bu fon’da klubning sobiq direktori Toni Freysha keskinroq chiqib ketdi: «Ular uyatsizlar, sudga berishimiz kerak», degan mazmunda gapirdi. Flik jamoaga «qayta yuklanish» zarurligini aytayotgan, darvozabon Joan Garsiya esa «bunday holatlar bo'lib turadi» deya vazmin munosabat bildirayotgan paytda, bu bayonot tribunadagi hissiyotga o'xshab ketdi.
Joan Laporta esa ancha ehtiyotkor o'ynayapti: «ta’sir doiralari», maydon ichida va tashqarisidagi «odamlar», «Barsaning g'alabasini istamaydiganlar» hamda katalon kimligini himoya qilish haqida gapiryapti. Bunday ritorika mart oyidagi saylovlar oldidan elektoratni birlashtirishga ham xizmat qiladi.
Klubning Ispaniya federatsiyasiga yuborgan rasmiy shikoyati esa emotsiyadan ko'ra mazmunliroq: VAR audioyozuvlari, monitor oldida epizodlarni ko'rib chiqish mezonlari, intizomiy qarorlardagi izchillik masalalari bo'yicha aniq talablar bor. Buni muhokama qilish ham, ishlash ham mumkin.
Xulosa bitta: La Liga yo'qolmaydi, «Barselona» ham ketmaydi. Hakamlar esa xato qilishda davom etadi — futbolning eng yoqimsiz, ammo tanish qismi shu.
Jironadagi 86-daqiqa «Barselona»ga uch ochko va ko'p asabga tushdi. Lekin ligani tark etish? Bu ham xuddi ertaga hamma birdan hakamlikdan rozi bo'lib qolishi kabi — deyarli imkonsiz ssenariy.
“Zamin”ni Telegramʻda oʻqing!
