O‘zbekiston Superligasida yangi mavsum oldidan jamoalar tarkibini kuchaytirish ishlari yakuniy pallasiga kirdi. Transferlar oynasi yopilishiga sanoqli vaqt qolganda, klublar bir-biridan jarangdor nomlarni e’lon qilib, muxlislarni hayratda qoldirmoqda.
"Andijon": Terma jamoa yulduzi vodiyda!
Yangi mavsumda yuqori maqsadlarni ko‘zlayotgan "burgutlar" transfer bozorida haqiqiy "bomba" portlatdi. O‘zbekiston milliy terma jamoasining mahoratli a’zosi Azizbek Turg‘unboyev endi "Andijon" sharafini himoya qiladi. Shuningdek, jamoa kelajakka ham sarmoya kiritdi — o‘smirlar o‘rtasida Osiyo chempioni bo‘lgan iqtidorli Sayfiddin Sodiqov bilan shartnoma imzolandi.
"Navbahor": Chempionlik uchun kuchli hujum chizig‘i
Namanganning "lochinlar"i bu yil faqat oltin medallar uchun kurashishini yaqqol namoyish etmoqda. Jamoa "Nasaf" va milliy terma jamoaning gollarga tashna hujumchisi Husayn Norchayevni o‘z safiga qo‘shib oldi. Bundan tashqari, namanganliklar hujumini braziliyalik sehrgar Aleks Fernandes yanada kuchaytiradigan bo‘ldi.
"Paxtakor": Sergeev o‘rniga Yevropa tajribasi
Igor Sergeevning Eronning "Persepolis" klubiga yo‘l olishi "sherlar"ni yangi hujumchi qidirishga majbur qildi. Toshkentliklar bu bo‘shliqni polshalik tajribali forvard Pyotr Parjishek bilan to‘ldirishdi. Pyotr o‘z faoliyati davomida Niderlandiya, Ispaniya va Italiya kabi kuchli chempionatlarda to‘p tepgan bo‘lib, uning tajribasi "Paxtakor"ga juda qo‘l kelishi kutilmoqda.
"Dinamo": Samarqandda Argentina ruhi
O‘tgan mavsumdagi zafarli yurishlarini davom ettirmoqchi bo‘lgan "Dinamo" ham legionerlar bozorida faol. Bugun jamoa safiga Argentinaning afsonaviy "River Pleyt" klubi tarbiyalanuvchisi Salvador Sanches kelib qo‘shildi. Himoyaning o‘ng va markaziy nuqtalarida birdek ishonchli harakat qiladigan Sanches Samarqand klubiga erkin agent sifatida qo‘shildi.
Transfer oynasining so‘nggi daqiqalarida yana qanday kutilmagan yangiliklar bo‘lishini birgalikda kuzatamiz!
Sizningcha, ushbu transferlar ichida eng foydali xarid qaysi biri bo‘ldi?
“Zamin”ni Telegramʻda oʻqing!
