Paragvaylik sobiq darvozabon Xose Luis Chilavert Chempionlar ligasi o'yinida yuz bergan mojaroda «Benfika» futbolchisi Janluka Prestiannini qo'llab-quvvatladi. Avvalroq «Real» vingeri Vinisius Junior Prestiannini uchrashuv davomida o'ziga nisbatan irqchilik qilganlikda ayblagandi. Bu haqda euro-football.ru xabar beradi.
Chilavertning aytishicha, vaziyat biryoqlama baholanmasligi kerak. «Men Prestiannini qo'llab-quvvatlayman. Vinisius birinchi bo'lib hammani ketma-ket haqorat qilishni boshlaydi», — dedi u Radio Rivadavia efirida.
Eslatib o'tamiz, UEFA «Benfika» — «Real» uchrashuvidan keyin holat bo'yicha surishtiruv boshlagan. Biroq agar haqoratli so'zlar bo'lgan taqdirda ham, ularni isbotlash qiyin bo'lishi mumkin — Prestianni epizod paytida og'zini futbolkasi bilan berkitib olgani qayd etilgan.
Jamoalar o'rtasidagi javob o'yini 25 fevral kuni bo'lib o'tadi. «Real» ilk uchrashuvda safarda 1:0 hisobida g'alaba qozongani sababli kichik ustunlikka ega.
Chilavert mojaroga yana bir savolni ham qo'shdi: «Real»dagi futbolchilarning 90 foizi — qora tanli. Nega muammo faqat Vinisiusda paydo bo'ladi?»
“Zamin”ni Telegramʻda oʻqing!
