«Real»ning sobiq bosh murabbiyi Zinedin Zidan haqidagi navbatdagi katta gap-so‘zlar yana avj oldi. Jurnalist Fabritsio Romano aytishicha, jahon chempionatidan keyin Zidan Fransiya milliy jamoasi bosh murabbiyi lavozimiga kelish ehtimoli bor va bu borada Fransiya futbol federatsiyasi bilan og‘zaki kelishuv ham mavjud.
Romano bu mavzudagi muhokamalarni tushuntirar ekan, Zidan atrofida doim «Real» yoki boshqa top-klublar bilan bog‘liq mish-mishlar aylanishini eslatgan. Xususan, dekabr oyida ham uni Madrid klubiga qaytishi mumkinligi haqida turli xabarlar chiqqan. Biroq Romanoning fikricha, «Real»dagi ehtimoliy o‘zgarishlar ssenariysida boshqa nomzodlar ham bor: u agar Xabi Alonso ketsa, klub tizimida ishlab kelayotgan Arbeloa varianti ko‘proq mantiqiy bo‘lishini aytgan va hozir ham Arbeloa klub strukturasida qolmoqda.
Zidan masalasida esa Romano asosiy nuqtani ochiq aytgan: uning Fransiya termasini mundialdan keyin qabul qilib olishi bo‘yicha og‘zaki kelishuv bor. Hozircha esa barcha diqqat amaldagi bosh murabbiy Desham bilan jahon chempionatiga tayyorgarlikka qaratilgani urg‘u qilingan.
Shu yerda Romano yana bir muhim jihatni ta’kidlaydi: federatsiya ham, futbolchilar ham, Deshamning o‘zi ham hurmatga loyiq pozitsiyada. Oldinda ulkan turnir turgan paytda “murabbiylik o‘rni bo‘shatilyapti” degan kayfiyat yaratish hech kimga kerak emas. Ammo kutilma shuki, mundial tugagach, Zidan yana murabbiylik faoliyatiga qaytib, milliy jamoani boshqarishi mumkin.
Biroq, Romano o‘zi ham oxirida tormozni bosib qo‘yadi: bu hozircha faqat og‘zaki gaplar darajasida. Futbolda ayniqsa murabbiylar mavzusida “100 foiz aniq” degan narsa kam uchraydi — vaziyat bir kunda o‘zgarib ketishi mumkin.
Ma’lumot uchun, 53 yoshli Zinedin Zidan 2021-yil iyun oyida «Real» bosh murabbiyligi bilan xayrlashgan va shundan beri bosh murabbiy sifatida rasmiy ish boshlamagan. Shuning uchun ham uning qaytishi haqidagi har qanday signal futbol olamida tezda katta shov-shuvga aylanyapti.
“Zamin”ni Telegramʻda oʻqing!
