Chempionlar ligasi pley-off bosqichi javob bahsida “Inter” o‘z maydonida “Budyo-Glimt”ga 1:2 hisobida mag‘lub bo‘lib, musobaqa bilan xayrlashdi. Uchrashuvdan keyin milanliklar bosh murabbiyi Kristian Kivu bu natija yuzasidan o‘z fikrlarini bildirdi. U jamoasining harakatini himoya qildi, ammo raqibning bugungi kunda kuchliroq chiqqanini ham tan oldi.
Kivuga ko‘ra, “Inter” zich himoyalangan va tartibli o‘ynagan jamoaga qarshi qo‘lidan kelgancha harakat qilgan. U futbolchilarni tanqid qilish o‘rniga, ularning bor kuchini sarflaganini urg‘uladi.
— Juda zich himoyalangan jamoaga qarshi qo‘limizdan kelganini qildik. Yigitlarni bu natijada ayblay olmayman, chunki ular muvaffaqiyatga erishish uchun bor kuchlarini sarflashdi. Natijadan juda xafamiz. Afsuski, o‘zimizdan kuchli jamoaga qarshi o‘ynadik, — dedi u.
Shu bilan birga, murabbiy raqibni ham ochiq tabrikladi. Uning fikricha, “Budyo-Glimt” keyingi bosqich yo‘llanmasini mutlaqo haqli qo‘lga kiritgan.
Matbuot anjumanida Kivudan “Chempionlar ligasida boshqacharoq o‘yin ko‘rsatish mumkinmidi?” degan savol ham so‘raldi. Bu savolga javoban u jamoaning asosiy maqsadi har doim raqobatbardosh bo‘lish bo‘lganini aytdi. Lekin ayrim jihatlarda yaxshiroq harakat qilish mumkinligini ham yashirmadi.
— Maqsadimiz — raqobatbardosh bo‘lish. Har doim shunga amal qilib kelganmiz. O‘yinni yanada aniqroq boshlashimiz mumkin edi. Agar vaqtida gol urganimizda, raqibni bosim ostida ushlab turishimiz mumkin edi. Lekin imkoniyatlarimiz bunga yo‘l bermadi, — deya izohladi murabbiy.
Kivu, shuningdek, zich taqvim ham o‘z ta’sirini ko‘rsatganini ta’kidladi. Uning fikricha, har uch kunda maydonga tushish jamoaning jismoniy tiklanishiga qiyinchilik tug‘diradi. Ammo buni to‘liq bahona sifatida ko‘rsatmasdan, o‘yinda boshqacharoq futbol ham namoyish qilish mumkin bo‘lganini tan oldi.
— Har uch kunda o‘ynasangiz, kuchni qayta to‘plash oson emas. Lekin takror aytaman, biz yaxshiroq o‘ynab, boshqacha futbol ko‘rsatishimiz mumkin edi. Raqib 10 nafar futbolchi bilan himoyalandi, bunday zichlikni yorib o‘tish juda qiyin. Turnirda uzoqqa borishni istagandik. Endi bu mag‘lubiyatni tezroq unutish va oldinga qarash kerak, — dedi u.
Qisqasi, Kivudan chiqqan asosiy messej shunday: “Inter” urinish qildi, lekin bu kecha raqib yaxshiroq tayyor bo‘lgan. Endi milanliklar uchun eng muhim vazifa — Chempionlar ligasidagi alamni orqaga tashlab, qolgan musobaqalarda o‘zini tiklab olish.
“Zamin”ni Telegramʻda oʻqing!
