Yevropa Chempionlar ligasi pley-off bosqichi hal qiluvchi pallaga kirib bormoqda. Bugun ushbu bosqich doirasida yana to‘rtta javob uchrashuvi bo‘lib o‘tadi va ularning har biri nimchorak final yo‘llanmasi uchun katta ahamiyatga ega. UEFA rasmiy ma’lumotiga ko‘ra, 25-fevral kuni “Atalanta” — “Borussiya Dortmund”, “PSJ” — “Monako”, “Real Madrid” — “Benfika” hamda “Yuventus” — “Galatasaroy” juftliklari maydonga chiqadi.
Kun dasturini Toshkent vaqti bilan 22:45 da start oladigan “Atalanta” — “Borussiya Dortmund” bahsi ochib beradi. Ilk o‘yinda dortmundliklar 2:0 hisobida ustun kelgani uchun, bergamoliklar o‘z maydonida kamida ikki gollik farqni qoplashga majbur. Bu esa Italiyadagi to‘qnashuvni bugungi kechaning eng keskin bahslaridan biriga aylantiryapti.
Qolgan uchrashuvlar esa Toshkent vaqti bilan 01:00 da bir vaqtda boshlanadi. “PSJ” o‘z maydonida “Monako”ni qabul qiladi. Birinchi bellashuvda parijliklar 3:2 hisobida g‘alaba qozongan, demak, intriga hali ham tirik va bu fransuzcha to‘qnashuvda har bir gol katta ahamiyat kasb etadi.
Shu vaqtning o‘zida Madridda “Real” — “Benfika” qarshiligi bo‘lib o‘tadi. Lissabondagi ilk bahsda “qaymoqranglilar” 1:0 hisobida zafar quchgani uchun, “Bernabeu”dagi javob uchrashuvida madridliklar minimal ustunlikni saqlab qolishga, portugaliyaliklar esa kambek qilishga urinadi. UEFA statistikasiga ko‘ra, “Real” bunday ikki o‘yinli qarama-qarshiliklarda katta tajribaga ega.
Yana bir qiziq juftlik — “Yuventus” va “Galatasaroy”. Ilk uchrashuvda turk klubi 5:2 hisobida g‘alaba qozonib, deyarli masalani hal qilib qo‘ygan. Endi turinliklar uyda mo‘jiza qidiradi, “Galatasaroy” esa katta ustunlikni asrab, keyingi bosqichga chiqishni ko‘zlaydi.
Qisqasi, bugungi tun — YECHL uchun navbatdagi asab sinovi. Kimdir ustunlikni saqlaydi, kimdir so‘nggi kuchini tashlab kambek qiladi. Muxlislar uchun esa ssenariy tayyor: 22:45 da start, 01:00 da esa haqiqiy “futbol marafoni”.
“Zamin”ni Telegramʻda oʻqing!
