«Manchester Yunayted»da ser Jim Retkliff klub egalaridan biriga aylanganidan keyin boshlangan qat’iy tejamkorlik siyosati hali-hamon katta muhokamalarga sabab bo‘lmoqda. Klub ichidagi keskin xarajat qisqartirish choralari ko‘pchilik tomonidan go‘yoki “shok terapiyasi” sifatida baholangan bo‘lsa-da, rahbariyat bu qarorlar tasodifiy emasligini va ular ortida aniq moliyaviy hisob-kitob borligini ta’kidlamoqda. Reuters xabariga ko‘ra, aynan shu “transformatsiya rejasi” tufayli klub so‘nggi hisobotda foydaga chiqqanini ma’lum qildi.
Klub bosh direktori Omar Berradaning aytishicha, xarajatlarni optimallashtirish fonida 2025/2026 mavsumining birinchi yarmida operatsion foyda 32,6 million funtga yetgan. Bu esa o‘tgan hisobot davridagi 3,9 million funtlik operatsion zarar bilan solishtirganda juda katta burilish hisoblanadi. Ya’ni klubning moliyaviy hisobotida kamida qisqa muddatli nafas rostlash sezilmoqda.
Berradaning fikricha, bu raqamlar maydon tashqarisida olib borilayotgan islohotlar samara bera boshlaganini ko‘rsatadi. Xarajatlarni qisqartirish, ish haqi yukini kamaytirish va ayrim ichki sarf-xarajatlarni qayta ko‘rib chiqish orqali klub moliyaviy jihatdan biroz mustahkamroq ko‘rina boshladi. Ammo bu holat hozircha to‘liq barqarorlikka erishildi, degani emas.
Chunki foyda o‘sganiga qaramay, «qizil iblislar»ning umumiy qarz yuki hali ham juda og‘irligicha qolmoqda. The Times va boshqa manbalarga ko‘ra, barcha majburiyatlar qo‘shib hisoblanganda klubning umumiy qarzi qariyb 1,3 milliard funtga yaqinlashib qolgan. Bu ko‘rsatkichga aylanma kreditlar, eski qarzlar va asosan transferlar bo‘yicha to‘lanmagan majburiyatlar ham kiradi.
Yana bir muhim nuqta shundaki, bu raqamlar ichiga yangi stadion loyihasi xarajatlari kiritilmagan. Reuters va klub atrofidagi hisobotlarda «Manchester Yunayted» yangi arenasi uchun taxminan 2 milliard funt sarflanishi mumkinligi aytilgan. Demak, infratuzilma bo‘yicha bu ulkan reja amalga kirsa, klubning moliyaviy bosimi yanada ortishi ehtimoli bor.
Qisqasi, «Manchester Yunayted» bugun qiziq paradoks ichida turibdi: bir tomondan, tejamkorlik siyosati qisqa muddatda foyda keltiryapti; ikkinchi tomondan esa, qarzlar hajmi hali ham xavotirli darajada yuqori. Shuning uchun klubdagi bu islohotlar hozircha muammoni to‘liq hal qilgani yo‘q — ular faqat og‘ir vaziyatni biroz nazoratga olishga urinayotgan jarayon, xolos.
“Zamin”ni Telegramʻda oʻqing!
