A Seriyasining 27-tur markaziy bahsida «Roma» o'z maydonida inqiroz holatidagi «Yuventus»ni qabul qildi va uch ochko uchun oxirigacha kurashdi. Bu haqda euro-football.ru xabar beradi.
Uchrashuv boshida rimliklar bir necha bor keskin vaziyat yaratdi: Nikcolo Pizilli to'pni olib qo'yib, jarima maydoni chap chetidan pastdan zarba berdi, darvozabon qaytargan to'pda esa Lorenzo Pellegrini bosim ostida to'pni ustun ustidan oshirib yubordi. Keyinroq Gianluka Manchini uzatmasidan so'ng Doniell Malen yaqin masofadan zarba yo'lladi, biroq to'p darvozabonning yuziga tegdi.
«Yuventus» ham javobsiz qolmadi: Pyer Kalyulyu o'ng qanotdan uzatgan to'pdan so'ng Ueston Makkenni sakkiz metrlar atrofidan biroz chaproqqa yo'lladi. 39-daqiqada esa Uesli Fransa chap qanotdan jarima maydoni chizig'igacha yorib kirib, hech kim xalal bermagan vaziyatda to'pni o'ng burchakka aniq joylashtirdi — 1:0.
Ikkinchi bo'lim turinliklar goli bilan boshlandi: standart vaziyatdan keyin «Yuventus» jarima maydonida bir necha pas almashdi va Fransishku Konseysau uzoq «to'qqizlik»ka bexato zarba berib, hisobni tenglashtirdi — 1:1.
54-daqiqada «Roma» burchak to'pini o'ynadi: Pellegrini darvoza oldi chizig'iga uzatma berdi, Evan N'Dika esa oyog'ini qo'yib, to'pni o'ng burchakka yo'naltirdi — 2:1.
65-daqiqada Kuadio Kone chap qanotga Malenni uzatdi. Doniell jarima maydoniga kirib, oldinga chiqqan darvozabon ustidan to'pni oshirib tashladi — 3:1.
Biroq «Yuventus» taslim bo'lmadi. 78-daqiqada o'ng qanotdan uzatma paytida kurashda Zeki Chelik to'pni raqibga qaytarib qo'ydi, Jeremi Boga esa yaqin burchakka kuchli zarba bilan farqni qisqartirdi — 3:2.
90-daqiqada turinliklar yana standartdan foydalandi: Makkenni bosh bilan to'pni davom ettirdi, Federiko Gatti esa uni tarmoqqa mixlab, «Yuventus»ni mag'lubiyatdan qutqarib qoldi — 3:3.
Ushbu durangdan keyin «Roma» turnir jadvalida «Napoli»dan keyin 4-o'rinda bormoqda. «Yuventus» esa 6-pog'onada qolmoqda.
“Zamin”ni Telegramʻda oʻqing!
