Turkiya Superligasining 25-turida «Bashakshehir» o‘z maydonida «Gyoztepe»ni qabul qildi va 2:1 hisobida muhim g‘alabani qo‘lga kiritdi. Uch ochko istanbulliklar uchun nafaqat jadvaldagi o‘rin, balki ruhiy jihatdan ham katta kuch bo‘ldi — chunki raqib ham to‘g‘ridan to‘g‘ri 5–6-pog‘onalar atrofida kurashayotgan jamoa edi.
O‘yin boshidayoq Abbosbek Fayzullayev o‘zining ta’sirini ko‘rsatdi. 13-daqiqada u ajoyib uzatma bilan jamoadoshini golga chiqarib berdi va O‘mer Ali hisobni ochdi. Muxlislar uchun eng yoqimlisi — bu epizodda aynan o‘zbekistonlik legionerning “kalit pas”i hal qiluvchi bo‘ldi.
Biroq ikkinchi bo‘lim boshlanishi bilan Fayzullayev zaxiraga olindi. Uning o‘rniga maydonga tushgan Ivan Brnich keyinchalik jamoa uchun hal qiluvchi golni urdi: 69-daqiqada u tabloni 2:1 ko‘rinishiga keltirib, «Bashakshehir»ga g‘alaba eshigini ochdi. «Gyoztepe»ning javobi esa birinchi taymda kelgan — 39-daqiqada Antunes hisobni tenglashtirgan edi.
Eldor Shomurodov esa bahsni to‘liq o‘tkazib, old chiziqda kurash, bosim va harakat bilan jamoasiga foyda keltirdi. Har doimgidek, maydonda “ko‘zga tashlanmaydigan” ishlarni qilib berdi: himoyachilarni o‘ziga tortish, pressingda yordam, hujumni ushlab turish.
Natijada Shahin jamoasi ochkolarini 42 taga yetkazib, 5-o‘ringa ko‘tarildi. «Gyoztepe» ham xuddi shuncha ochko bilan 6-pog‘onaga tushdi. Ya’ni jadvalda raqobat o‘ta siqilgan: bitta o‘yin — va joying o‘zgaradi.
Turkiya Superligasi. 25-tur
Bashakshehir – Gyoztepe 2:1
Gollar: O‘mer 13, Brnich 69 – Antunes 39.
Bashakshehir: Muhammad, O‘mer Ali, Duarte, Opoku, Operi, Berat (O‘zdemir, 62), Umut, FAYZULLAYEV (Brnich, 46), Yusuf, Zelke (Ergun, 62), SHOMURODOV.
“Zamin”ni Telegramʻda oʻqing!
