Angliyaning "Liverpul" klubi yarim himoyachisi Aleksis Makallister Ispaniyaning "Real Madrid" jamoasi e'tiboriga tushdi. Mashhur jurnalist Ekrem Konur tarqatgan xabarlarga ko'ra, "Qirollik klubi" yozgi transferlar oynasida argentinalik futbolchini o'z tarkibiga qo'shib olishni rejalashtirmoqda. Ayni damda "Liverpul" o'z yetakchisi bilan amaldagi shartnomani uzaytirish bo'yicha muzokaralar olib bormoqda, biroq Madrid klubining qiziqishi vaziyatni murakkablashtirishi mumkin.
Jahon chempioni bo'lgan Makallister joriy mavsumda "Liverpul" safida barqaror o'yin namoyish etmoqda. U barcha musobaqalarda 41 ta uchrashuvda maydonga tushib, 5 ta gol urishga va 4 ta golli uzatmani amalga oshirishga muvaffaq bo'ldi. Futbolchining maydondagi harakatlari va o'yinni boshqarish qobiliyati "Real Madrid" skautlarining e'tiborini tortgan. "Transfermarkt" portali ma'lumotlariga ko'ra, 25 yoshli yarim himoyachining bozor qiymati 85 million yevroni tashkil etadi.
Hozircha "Liverpul" rahbariyati o'z futbolchisini qo'yib yuborish niyatida emas va u bilan hamkorlikni uzoq muddatga uzaytirishga harakat qilmoqda. "Real Madrid" esa tarkibni kuchaytirish maqsadida yozda aniq qadamlar tashlashi kutilmoqda. Futbol olamidagi ushbu transfer mish-mishlari yaqin oylarda yanada qizg'in tus olishi shubhasiz.
“Zamin”ni Telegramʻda oʻqing!
